وفاقی وزیرداخلہ محسن نقوی سے برطانوی رکن پارلیمنٹ خالد محمود کی ملاقات

وفاقی وزیرداخلہ محسن نقوی سے برطانوی رکن پارلیمنٹ خالد محمود نے ملاقات کی ہے۔ ملاقات میں اوورسیز پاکستانیوں کے مسائل کے فوری حل کیلئے اقدامات پر گفتگو کی گئی۔

وزارت داخلہ کی جانب سے جاری اعلامیہ کے مطابق برطانوی رکن پارلیمنٹ خالد محمود نے اوورسیز پاکستانیوں کے لئے ٹائم لائن میں پاسپورٹ کے اجراء کا مسئلہ حل کرنے پر وفاقی وزیرداخلہ سے اظہار تشکر کیا۔

انہوں نے کہا کہ آپ نے اوورسیز پاکستانیوں کا دیرینہ مسئلہ حل کر کے دل جیت لئے ہیں۔ خالد محمود نے اس امید کا اظہار کیا کہ آپ بیرون ملک مقیم پاکستانیوں کے دیگر مسائل کے حل کیلئے اپنا بھرپور کردار ادا کریں گے۔

وفاقی وزیرداخلہ محسن نقوی نے ملاقات کے دوران کہا کہ بیرون ملک مقیم پاکستانیوں کی خدمات لائق تحسین ہیں۔اوورسیز پاکستانیوں کی سہولت کیلئے ہر سطح پر اقدامات جاری رکھیں گے۔