کرپشن اورنا اہلی کسی صورت برداشت نہیں، وزیراعظم

وزیراعظم محمد شہباز شریف نے کہا ہے کہ کرپشن، نااہلی اور نالائقی کو برداشت نہیں کیا جائے گا ، زیرو ٹالرنس پالیسی پر عمل پیرا ہیں۔

وزیراعظم شہباز شریف نے اپنے ٹوئٹ میں کہا کہ پاکستان پبلک ورکس ڈیپارٹمنٹ (پی ڈبلیو ڈی)کو ختم کرنے کا میرا فیصلہ اس خرابی کو دور کی طرف ایک قدم ہے جو ہمارے نظام کو اندر سے کینسر کی طرح کھا رہی ہے۔

انہوں نے کہا کہ میں ایک ایماندار، دیانتدار اور اہل بیوروکریسی بنانے کے لیے پوری طرح پرعزم ہوں جو اعلیٰ معیار کی عوامی خدمت فراہم کرے گی اور حکمرانی کے معیار کو بلند کرے گی۔

یاد رہے کہ گزشتہ روز وزیر اعظم شہباز شریف نے پاکستان پبلک ورکس ڈیپارٹمنٹ کو ناقص کارکردگی اور کرپشن پر فوری طور پر ختم کرنے کی ہدایت کردی تھی۔وزیر اعظم کی زیر صدارت حکومتی اخراجات اور حکومتی ڈھانچے کا حجم کم کرنے کے حوالے سے اہم اجلاس ہوا۔

وزیراعظم شہباز شریف نے کہا کہ پاک پی ڈبلیو ڈی بطور ادارہ اپنے مقاصد کے حصول میں ناکام رہا۔