پاکستان، ترکیہ اور انڈونیشیا کا اسلاموفوبیا سے نمٹنے کیلئے بڑا اقدام

نیویارک میں پاکستان، ترکیہ اور انڈونیشیا کے قونصل جنرلز نے اسلام کے خلاف نفرت کا مقابلہ کرنے کے حوالے سے مشترکہ طور پر ایک اہم تقریب کا اہتمام کیا۔

قونصل جنرلز نے اپنے افتتاحی بیانات میں اسلام کے خلاف نفرت کا مقابلہ کرنے کے حوالے سے اپنی حکومتوں کے مشترکہ عزم پر زور دیتے ہوئے امن، برداشت اور بین المذاہب مذاکرات کی بھی حمایت کی۔

پاکستان کے قونصل جنرل عامر احمد نے غزہ میں اسرائیل کی جانب سے نسل کشی کے حملوں کو عالمی سطح پر اسلام کے خلاف نفرت کی تاریک عکاسی قرار دیتے ہوئے نفرت انگیز تقاریر، ٹارگٹڈ حملوں اور مسلمانوں کے خلاف امتیازی سلوک سمیت دنیا بھر میں جاری اسلام مخالف واقعات کو اجاگر کیا۔

انہوں نے بھارت میں مذہبی مقامات کی منظم تباہی اور مقبوضہ جموں و کشمیراور پورے بھارت میں دیگر اسلام مخالف مظاہروں کی جانب بھی توجہ مرکوز کرائی۔