غزہ میں بچوں کےحقوق کی خلاف ورزیاں، اسرائیل بلیک لسٹ میں شامل

اقوام متحدہ نے غزہ میں بچوں کے خلاف انسانی حقوق کی سنگین خلاف ورزیوں پر اسرائیل کو اپنی بلیک لسٹ میں شامل کر لیا۔

اقوام متحدہ کے سیکرٹری جنرل انتونیو گوتریس کی جانب سے پیش کی گئی ایک سالانہ رپورٹ میں مسلح تنازعات میں بچوں کے خلاف انسانی حقو کی خلاف ورزیوں کے بارے میں بتایا گیا۔ اس فہرست کو ’لسٹ آف شیم ‘ بھی کہا جاتا ہے۔

اسرائیل میڈیا رپورٹ کے مطابق اس بلیک لسٹ میں روس، افغانستان، صومالیہ، شام، یمن، داعش اور بوکو حرام بھی شامل ہیں۔

غیر ملکی خبر رساں ادارے کے مطابق اقوام متحدہ کی یہ رپورٹ جون کے آخر تک شائع کر دی جائے گی۔

گذشتہ ہفتے عالمی ادارہ صحت (ڈبلیو ایچ او) کے مطابق غزہ میں کم از کم پانچ میں سے چار بچے 72 گھنٹوں میں سے پورا ایک دن خوارک کے بغیر رہے ہیں۔

فلسطینی حکومت کے مطابق کم از کم 32 افراد جن میں سے بیشتر تعداد بچوں کی ہے، غزہ میں جنگ کے آغاز سے اب تک خوراک کی قلت سے جان سے جا چکے ہیں۔

یاد رہے کہ بچوں کے خلاف انسانی حقوق کی خلاف ورزیوں پر انسانی حقوق کی تنظیموں نے بہت عرصے سے اقوام متحدہ پر زور دے رکھا تھا کہ وہ اسرائیل کو فہرست میں شامل کرے۔

واضح رہے کہ 2022 میں اقوام متحدہ نے تنبیہہ جاری کی تھی کہ اگر اسرائیل نے بچوں کے حقوق میں بہتری نہیں لائی تو وہ فہرست کا حصہ بن سکتا ہے۔