جنگجو ؤ ں کے عجائب گھر کا دورہ ، چین جیسی عظیم قومیں اپنے تاریخی ورثے کا تحفظ کرتی ہیں، شہباز شریف

وزیراعظم محمد شہبازشریف نے اپنے وفد کے ہمراہ چین کے شہر شی آن میں ٹیرا کوٹا جنگجوئوں کے عجائب گھر کا دورہ کیا ۔

دورے میں وزیراعظم اوران کے وفد کو تاریخی ورثے کے تحفظ اور بحالی اور سیاحت کے فروغ کے بارے میں آگاہ کیاگیا ، وزیراعظم نے عجائب گھر کے مختلف حصے دیکھے اور چین کے قدیم ورثے اور چینی دستکاری کی تعریف بھی کی ۔

انہوں نے کہاکہ چین جیسی عظیم قومیں اپنے تاریخی ورثے کا تحفظ کرتی ہیں۔ انہوں نے کہاکہ چین کی حکومت کی طرف سے اس ثقافتی ورثے کا تحفظ اوربحالی قابل رشک ہے۔

اس موقع پرشہبازشریف نے کہاکہ چین نے اپنی محنت کے ذریعے ہرشعبے پراپنے نقوش چھوڑے ہیں ، انہوں نے عجائب گھر کے دورے کی دعوت دینے پر چین کے صدر شی جن پنگ کا شکریہ اداکیا۔

شہبازشریف نے کہاکہ پاکستان کا تاریخی اور ثقافتی ورثہ نہایت دلکش ہے اور عزم ظاہر کیاکہ ملک کے تاریخی مقامات کو بحال کرکے انہیں سیاحتی مقامات میں تبدیل کیاجائے گا۔

اس سے پہلے شی آن پہنچنے پر شانشی صوبے کے نائب گورنرچین چن جیانگ اور دونوں ملکوں کے اعلی سفارتی عملے نے وزیراعظم اوران کے وفد کا گرم جوشی سے استقبال کیا۔