پاکستان اور برطانیہ کا تعلقات مزید مستحکم کرنے پر اتفاق

 پاکستان اور برطانیہ نے باہمی دلچسپی کے تمام شعبوں میں اپنی شراکت داری کو مزید گہرا کرنے اور اسے وسعت دینے کیلئے کام جاری رکھنے پراتفاق کیا ہے۔

 نائب وزیراعظم اور وزیرخارجہ سینیٹر محمد اسحاق ڈار اور مشرق وسطی، شمالی افریقہ، جنوبی ایشیا، اقوام متحدہ اور دولت مشترکہ کیلئے برطانیہ کے وزیر مملکت لارڈ طارق احمد کے درمیان اردن کے شہر عمان میں ملاقات ہوئی جس میں اتفاق رائے کیا گیا ۔ 

ملاقات کے دوران فریقین نے پاکستان اور برطانیہ کے درمیان دوطرفہ تعلقات میں مثبت پیشرفت پر اطمینان کا اظہار کیا ، نائب وزیراعظم نے بین المذاہب مکالمے کے فروغ اور مذاہب کی توہین کی روک تھام کیلئے اقدامات کی اہمیت پر زور دیا۔

انہوں نے بہترین تذویراتی شراکت داری کی شکل میں دوطرفہ تعلقات کو باضابطہ شکل دینے اور ان کی توسیع اور اپ گریڈیشن پر زور دیا۔

ملاقات میں افغانستان جنوبی ایشیا اور مشرق وسطیٰ میں استحکام سمیت باہمی دلچسپی کے علاقائی امور پر بھی گفتگو کی گئی۔