فارم 47 کی حکومت نیا ٹیکس لگانے سے اجتناب کرے، فواد چوہدری

سابق وفاقی وزیر فواد چوہدری نے کہا کہ بجٹ میں صرف ٹیکس لگانے کی بات چیت ہو رہی ہے، اخراجات کنٹرول کرنے کا ذکر تک نہیں کیا جا رہا۔ نیا ٹیکس لگانے کا اختیار عوام کے منتخب نمائندوں کو ہے، فارم 47 کی حکومت نیا ٹیکس لگانے سے اجتناب کرے۔

راولپنڈی میں میڈیا سے گفتگو کرتے ہوئے فواد چودھری نے کہا کہ فارم 47 کی حکومت عوام پر ٹیکس نہیں لگا سکتی۔ بجٹ آج پیش ہو رہا ہے اور ٹیکس نیٹ کی بات کی جارہی ہے، اخراجات کنٹرول کرنے کا ذکر تک نہیں ہے، وزیر خزانہ نے کل کہا ہے مزید ٹیکس لگائیں گے۔

فواد چودھری نے کہا کہ ماڈرن جمہوریت میں ٹیکس لگانے کا اختیار منتخب لوگوں کو ہے، مہنگائی پہلے ہی بے قابو ہے، مزید ٹیکس لگانے سے مزید مہنگائی بڑھے گی۔

سابق وفاقی وزیر نے مزید کہا کہ اربوں روپے کے فںڈز کا اختیار وزرائے اعلیٰ کو دیا گیا کوئی پوچھنے والا نہیں، وزرائے اعلیٰ کو جوابدہ بنانا ضروری ہے، جب تک اخراجات پر قابو نہیں پایا جاتا نقصان ہوتا رہے گا۔