پاکستان افغان شہریوں کی دہری شہریت کو تسلیم نہیں کرتا، دفترخارجہ

ترجمان دفتر خارجہ ممتاز زہرہ بلوچ نے کہا کہ پاکستان افغان شہریوں کی دہری شہریت کو تسلیم نہیں کرتا۔ پاکستان افغان مہاجرین کی منتقلی کے لیے جرمنی، کینیڈا، آسٹریلیا سمیت دیگر ممالک کے ساتھ مل کر کام کررہا ہے۔

ممتاز زہرہ بلوچ نے ہفتہ وار بریفنگ کےدوران کہا کہ پاکستان اپنے لوگوں اور املاک کی حفاظت پر عمل پیرا ہے۔ کسی ایسے گروہ سے بات چیت نہیں کی جائے گی جو ملک میں دہشت گردی اور شہریوں کے قتل میں ملوث ہے۔

دفترخارجہ کی ترجمان نے کہا کہ پاکستان میں مقیم افغانی مہاجرین کو پی او آر کارڈز جاری کر دیئے گئے ہیں۔ افغان عبوری حکومت کے بعد پاکستان آنے والے 9 ہزار افغانی جرمنی، 6 ہزار آسٹریلیا اور 1127 امریکا جا چکے ہیں۔

پاکستان میں مقیم افغان مہاجرین کو واپس بھیجنے کا عمل تکمیل کے مرحلے میں ہے۔ اہم دستاویزات کے بغیر پاکستان میں رہنے والے تمام مہاجرین کا انخلاء جلد مکمل کیا جائے گا۔

ترجمان نے مزید کہا کہ کسی بھی قسم کے ملک دشمن عناصر کو پاکستان کی حدود میں رہنے نہیں دیں گے، جن سے ملک کے اندر دہشت گردی کا خطرہ درپیش ہو۔

دفتر خارجہ کے مطابق حکومت پاکستان نے عاصم افتخار کی اقوام متحدہ کے مستقل مشن میں تقرری کا فیصلہ کیا ہے، جس کے تحت پاکستان کی جانب سے عاصم افتخار کو تمام تر اختیارات اور سہولیات مہیا کی گئی ہیں۔

انہوں نے مزید کہا کہ نائب وزیراعظم اور وزیرخارجہ دونوں ممالک کی مشاورت سے افغانستان کا دورہ کریں گے۔

دفترخارجہ کے مطابق پاکستان کا حق ہے کہ وہ اپنے ہمسایہ ممالک سے تعلقات قائم کرے۔ پاکستان اور روس کے تعلقات مثبت سمت میں ہیں۔ ایس سی او کی سائیڈ لائن پر دونوں وزرائے مملکت کی ملاقات اس کی مثال ہے۔ بھارت مسئلہ کشمیر سے توجہ  ہٹانے کے لیے مسلسل الزام تراشیاں کر رہا ہے۔