فارم 47 کی حکومت بہکی بہکی باتیں کر رہی ہے، وزیر اعلیٰ کے پی

وزیر اعلیٰ خیبر پختوںخوا علی امین گنڈا پور نے کہا ہے کہ فارم 47 کی حکومت بہکی بہکی باتیں کر رہی ہے، یہ دوغلی پالیسی پر چل رہے ہیں اور اپنی سیاست بچانے کیلئے الٹے سیدھے بیانات دیتے ہیں

وزیر اعلیٰ خیبرپختونخوا نے میڈیا سے گفتگو کرتے ہوئے کہا ہے کہ پی ٹی آئی پر پابندی کوئی نہیں لگا سکتا، فارم 47 کے تحت بیٹھے لوگ باتیں کر رہے ہیں کہ وہ پابندی لگائیں گے اور ایسی پارٹی پر جس نے الیکشن میں سب سے زیادہ ووٹ لئے ہیں۔ انہوں نے مینڈیٹ چوری کرکے وزیراعظم بنایا ہے، مطالبہ کرتا ہوں کہ چیف الیکشن کمشنر کو اب استعفیٰ دے دینا چاہئے۔

وزیراعلیٰ خیبر پختونخوا نے کہا کہ یہ اپنی شہرت برقرار رکھنے کیلئے اس طرح کے بیانات دیتے ہیں، آپ سے مہنگائی ، پٹرول، ڈالر اور معیشت کنٹرول نہیں ہو رہی۔ آپ سے امن و امان اور صوبے کے معاشی حالات کنٹرول نہیں ہو رہے، اس لیے بہکی بہکی باتیں کر رہے ہیں۔

انہوں نے کہا کہ ہمارے ملک کے چیلنجز اس وقت اور ہیں، ہمارے صوبے کو دہشت گردی کا بہت بڑا چیلنج درپیش ہے، ہماری فوج، دیگر ادارے اور عوام دہشت گردی کا مقابلہ کر رہے ہیں۔