اسلام آباد پولیس نے پی ٹی آئی کے سیکرٹری اطلاعات رؤف حسن گرفتارکر لیا

اسلام آباد پولیس نے پاکستان تحریک انصاف (پی ٹی آئی) کے سیکرٹری اطلاعات رؤف حسن کو گرفتار کرتے ہوئے چیئرمین بیرسٹر گوہر کی گرفتاری کی تردید کر دی۔

پارٹی کے ترجمان رؤف حسن کو اسلام آباد میں جماعت کے مرکزی سیکریٹریٹ سے گرفتار کر لیا گیا ہے جبکہ جماعت کے رہنما نے بھی تصدیق کر دی ہے کہ برسٹر گوہر کو رہا کر دیا گیا ہے۔

اسلام آباد پولیس کی بھاری نفری اے ٹی ایس اسکواڈ اور لیڈی پولیس کے ہمراہ پی ٹی آئی مرکزی سیکرٹریٹ پہنچی، بیرسٹرگوہر اور رؤف حسن اس وقت سیکرٹریٹ میں موجود تھے جبکہ ویمن پولیس بھی تحریک انصاف کے سیکرٹریٹ کے باہرموجود رہی۔

چھاپے کے دوران پولیس نے پی ٹی آئی سیکرٹریٹ سے کمپیوٹر اور دیگر سامان بھی تحویل میں لے لیا جبکہ پولیس تمام ریکارڈ بھی ساتھ لے گئی ہے۔

بعدازاں چیئرمین پی ٹی آئی بیرسٹر گوہر نے بتایا کہ رؤف حسن کی طبیعت خرابی کے باعث ان کے ہمراہ پولیس لائینز گیا، مجھے گرفتار نہیں کیا گیا، پولیس نے کہا آپ کسی ایف آئی آر میں مطلوب نہیں۔ چھاپہ مار ٹیم کے ہمراہ خواتین پولیس اہلکار بھی تھیں جنہوں نے پی ٹی آئی خواتین کارکنان اور سیکرٹریٹ عملے کو بھی حراست میں لے لیا۔ پولیس نے میڈیا کو کوریج کی اجازت نہیں دی اور گرفتاری کی فوٹیجز بنانے پر صحافیوں سے موبائل بھی چھین لیے۔

دوسری طرف اسلام آبادپولیس نے چیئرمین پی ٹی آئی بیرسٹر گوہر کی گرفتاری کی خبروں کی تردید کردی ہے ، پولیس ذرائع کا کہنا ہے کہ پی ٹی آئی کے سیکرٹری اطلاعات رؤف حسن کو گرفتار کیا گیا ہے۔

پولیس کے مطابق بیرسٹر گوہر اور چار خواتین کو گرفتار نہیں کیا گیا نیز پی ٹی آئی سیکرٹریٹ سے پولیس لیپ ٹاپ اوردستاویزات ساتھ لے کر نہیں گئی۔