وفاقی وزیر اطلات عطا تارڑ کی قوم سے درخت لگانے کی اپیل

اسلام آباد: وزیر اطلاعات و نشریات عطاء اللہ تارڑ نے کہا  کہ درخت لگانے کی مہم میں بڑھ چڑھ کر حصہ لیں تاکہ آنے والی نسلوں کے مستقبل کو موسمیاتی تبدیلی کے چیلنج سے محفوظ رکھا جا سکے۔  

آج اسلام آباد میں کیپٹل ڈویلپمنٹ اتھارٹی (سی ڈی اے) کے زیر اہتمام شجر کاری مہم میں شرکت کرتے ہوئے انہوں نے کہا کہ حکومت درخت لگانے اور ہوا کے معیار میں بہتری لانے کے لیے پرعزم ہے۔ انہوں نے کہا کہ ہمیں درخت لگانے کو قومی فریضہ سمجھ کر اس مہم کو تعلیمی اداروں کی سطح تک لے جانا چاہیے۔

عطاء اللہ تارڑ نے کہا کہ مارگلہ نیشنل پارک اسلام آباد کی پہچان ہے اور اسے تمام خطرات سے بچانا ہماری اجتماعی ذمہ داری ہے۔ 

عطاء اللہ تارڑ نے کہا کہ ایک ایپ بھی لانچ کی جائے گی، جس سے لوگ اپنے لگائے گئے درختوں کا سراغ لگا سکیں گے۔ اس سے وہ اپنے درختوں کی بہتر دیکھ بھال کر سکیں گے۔

وزیر اطلاعات نے کہا کہ ذمہ داری کاربن کے اخراج کے بڑے شراکت داروں پر عائد ہوتی ہے کہ وہ موسمیاتی تبدیلی کے چیلنج سے نمٹنے میں پاکستان کی مدد کریں۔ انہوں نے نشاندہی کی کہ پاکستان کاربن کے اخراج میں صرف دو فیصد حصہ ڈالتا ہے لیکن موسمیاتی تبدیلی سے سب سے زیادہ متاثرہ ممالک میں سے ایک ہے۔