کراچی :راشد منہاس روڈ پرپولیس اور مظاہرین کے درمیان تصادم سے متعدد افراد زخمی

سپریم کورٹ کے حکم پر پولیس، رینجرز قانون نافذ کرنے والے ادارے ہیوی مشنری کے ہمراہ پویلین اینڈ کلب پہنچے تو وہاں موجود دوکانداروں نے مزاحمت کی جس کے نتیجے میں متعدد افراد زخمی ہوگئے جبکہ مظاہرین نے مطالبہ کیا ہے کہ تعمیرات مسمار کرنے سے قبل سپریم کورٹ کا تحریری حکم نامہ دیکھایا جائے۔

سینئر ڈائریکٹر انکروچمنٹ بشیر صدیقی کا کہنا ہے کہ شاپنگ ایریا اور پویلین اینڈ کلب سمیت اطراف میں تجاوزات کیخلاف ہر حال میں آپریشن کو مکمل کیاجائے گا جس کے بعد رپورٹ عدالت میں جمع کرائیں گے۔

سپریم کورٹ نے کراچی میں الہٰ دین پارک سے متصل پویلین اینڈ کلب اور پارک کے شاپنگ سینٹر کو 2 روز میں گرانے کا حکم دیا تھا۔ پیر 14جون کو سپریم کورٹ کراچی رجسٹری میں تجاوزات سے متعلق کیسز کی سماعت ہوئی، جس میں چیف جسٹس گلزار احمد نے الہٰ دین پارک سے متصل پویلین اینڈ کلب کو غیرقانونی قرار دیا۔

عدالت نے ریمارکس دیے کہ غیرقانونی طور پر زمین کو تبدیل کرکے کمرشل بنادیا گیا، لہٰذا پولیس اور رینجرز کی مدد سے فوری کارروائی کی جائے۔

سپريم کورٹ کراچی رجسٹری نے گزشتہ روز کشمیر روڈ پر قائم تمام تجاوزات جن میں کے ڈی اے کلب، اسکواش کورٹ، سوئمنگ پول و دیگر تعمیرات شامل ہیں انہیں فوری گرانے کا حکم دیا تھا۔

دوسری جانب کراچی سے الہ دین پارک سے متصل شاپنگ ایریا اور پویلین اینڈ کلب گرانے کے معاملے پر سپریم کورٹ نے تحریری فیصلہ جاری کردیا ہے۔