پی ٹی آئی کو احتجاج کی اجازت نہ دینے پر متعلقہ حکام کو نوٹسز جاری

اسلام آباد ہائی کورٹ نے پاکستان تحریک انصاف کو احتجاج کی اجازت نہ دینے پر سیکریٹری داخلہ، چیف کمشنر، ڈپٹی کمشنر اور آئی جی کو نوٹسز جاری کر دیے۔

پی ٹی آئی کو احتجاج کی اجازت کی درخواست پر فیصلہ نہ کرنے پر توہینِ عدالت کی درخواست پر سماعت ہوئی۔ جسٹس ثمن رفعت امتیاز نے پی ٹی آئی کی درخواست پر اعتراضات دور کر کے نوٹس جاری کیے۔

اس دوران پی ٹی آئی کے وکیل شعیب شاہین کا کہنا تھا کہ ہمیں گزشتہ روز اسلام آباد میں احتجاج کی اجازت نہیں دی گئی۔ ہمیں کل توہینِ عدالت کی درخواست دائر کرنے کے بعد ڈی سی کا آرڈر موصول ہوا۔

شعیب شاہین نے مزید کہا کہ ڈپٹی کمشنر نے درخواست دائر کرنے کے بعد ہماری درخواست مسترد کرنے کا آرڈر بھیجا۔

بعد ازاں  عدالت نے نوٹسز جاری کرتے ہوئے پی ٹی آئی کے احتجاج سے متعلق کیس کی سماعت کل تک ملتوی کر دی۔