پی ٹی آئی کو 22 اگست کو اسلام آباد میں جلسہ کرنے کی اجازت 

اسلام آباد انتظامیہ نے پی ٹی آئی کو 22 اگست کو جلسے کی اجازت دے دی۔اسٹیٹ کونسل نے اسلام آباد ہائیکورٹ کو آگاہ کر دیا۔

جسٹس میاں گل حسن اورنگزیب کی سربراہی میں پی ٹی آئی کو جلسے کی اجازت نہ دینے پر توہین عدالت کی درخواست پر سماعت ہوئی۔

سماعت کے آغاز پر پی ٹی آئی کے وکیل عدالت کے سامنے پیش ہوئے۔

پی ٹی آئی کے وکیل نے کہا کہ 22 جولائی کو درخواست دی ک 26 جولائی کو احتجاج کرنا ہے، عدالت نے استفسار کیا کہ کس فیصلے پر توہین عدالت ہے؟ اسٹیٹ کونسل نے کہا کہ دو آرڈرز ہم نے پاس کئے تھے۔

عدالت نے کہا کہ آپ نےلکھا 20 اگست کے بعد کسی جگہ جلسہ احتجاج کرسکتے ہیں۔ عدالت نے پی ٹی آئی وکیل سے کہا کہ توہین عدالت تواس پرنہیں بنتی، جج نے درخواست آپ کو بھیجی۔

عدالت نے کہا کہ فیض آباد بلاک ہوا اس کے نقصانات قوم کوہورہے ہیں، ڈی چوک پر تواحتجاج پر مکمل پابندی عائد کردیں، پچھلے فیض آباد دھرنے میں کتنے لوگ ایمبولینس میں فوت ہوئے؟

جسٹس میاں گل حسن اورنگزیب نے کہا کہ حکومتی پارٹی اجازت مانگے گی آپ پلیٹ میں رکھ کردیںگے، صرف یہ تو نہیں ہو سکتا یہ اپوزیشن میں ہیں، کیا آپ نے پارک میں احتجاج کی اجازت دی؟عدالت نے ریمارکس دیے کہ پارک پارک ہے اسے پارک رکھیں۔