ترمیمی بل 2024  سے ابہام کا خاتمہ ہوگا ، مخصوص نشستوں کے حوالے سے زیادہ وضاحت آئے گی، بلال اظہر کیانی

پائیدار ترقی اہداف کے حوالے سے قومی پارلیمانی ٹاسک فورس کے کنونیر بلا ل اظہر کیانی نے کہا ہے کہ قومی اسمبلی سے منظور ہونے والے انتخابات دوسرے ترمیمی بل 2024  سے ابہام کا خاتمہ ہوگا اور مخصوص نشستوں کے حوالے سے زیادہ وضاحت آئے گی۔

اسلام آباد میں قومی اسمبلی کے باہر میڈیا سے بات چیت کرتے ہوئے انہوں نے کہا کہ پاکستان تحریک انصاف کیس میں فریق نہیں تھی مگر اسے ریلیف دیا گیا۔

ایک سوال کے جواب میں بلال اظہر کیانی نے کہا کہ قومی اسمبلی نے بل کی منظوری دے دی ہے اور حکومت اس ضروری بل کی حمایت کرنے پر قانون سازوں کی مشکور ہے۔

انہوں نے اس امید کا اظہار کیا کہ سینیٹ بھی اس بل کی منظوری دے گی جس کے بعد یہ قانون بن جائے گا۔