اگلے چند دنوں میں عوام کو بجلی کی قیمتوں میں کمی کی خوشخبری دینگے، وزیراعظم

وزیراعظم شہباز شریف نے اسلام آباد میں ایک تقریب سے خطاب کرتے ہوئے کہا کہ آئندہ چند دنوں میں وہ پانچ سالہ معاشی پروگرام کا خاکہ پیش کریں گے،ملکی ترقی کے لیے اپنی تمام توانائی لگا دیں گے۔

وزیراعظم نے کہا کہ بجلی کے بلوں میں کمی کے بغیر ملک ترقی نہیں کر سکتا اور نہ ہی ہماری برآمدات بڑھ سکتی ہیں۔اگلے چند دنوں میں بجلی کی قیمتوں میں کمی کی خوشخبری ملے گی۔ 

شہباز شریف نے اس موقع پر ارشد ندیم کو سونے کا تمغہ جیتنے پر خراج تحسین پیش کیا اور اس کی والدہ کو بھی سراہا۔ انہوں نے کہا کہ گزشتہ 77 سالوں میں پاکستان نے بہت سے چیلنجز کا سامنا کیا ہے، لیکن ملک کی آزادی اور استحکام کو برقرار رکھنے کے لیے ضروری ہے کہ ہم اپنی غلطیوں کا محاسبہ کریں اور محنت سے کام کریں۔

وزیراعظم نے کہا کہ ملک کی معیشت کی بحالی اور بجلی کے بلوں میں کمی کے وعدے کو پورا کرنے کے لیے وہ اپنی جان لڑا دیں گے۔ موجودہ حالات سے نکلنے کے لیے سخت محنت اور ایمانداری کی ضرورت ہے۔

شہباز شریف نے نوجوانوں کو مخاطب کرتے ہوئے کہا کہ انہیں تعلیم اور ہنر پر توجہ دینی چاہیے اور دشمن قوتوں کی سازشوں سے ہوشیار رہنا چاہیے۔ انہوں نے کہا کہ حکومت ملک کی ترقی کے لیے ہر ممکن کوشش کرے گی ۔