پاکستان میں سوشل میڈیا پر سیفٹی فائر وال کا دوسرا کامیاب تجربہ

اسلام آباد: پاکستان میں سوشل میڈیا پلیٹ فارمز پر سیفٹی فائر وال کا دوسرا اور آخری کامیاب تجربہ گزشتہ رات مکمل کر لیا گیا ہے۔

اس حوالے سے وزارتِ اطلاعات و ٹیکنالوجی اور پاکستان ٹیلی کمیونیکیشن اتھارٹی (پی ٹی اے) کے حکام کی جانب سے کوئی رسمی تصدیق یا تردید نہیں کی گئی ہے۔ تاہم، وزارتِ اطلاعات و ٹیکنالوجی کے ایک سینئر افسر کا کہنا ہے کہ یہ معاملہ پی ٹی اے سے متعلق ہے۔

دوسری جانب، پاکستان بھر میں انٹرنیٹ سروسز میں مسلسل خرابی کا سامنا ہے۔ راولپنڈی اور اسلام آباد سمیت ملک کے مختلف شہروں میں موبائل ایپس متاثر ہو رہے ہیں اور ڈاؤن لوڈنگ کی رفتار بھی بہت سست ہو گئی ہے۔

ماہرین کے مطابق انٹرنیٹ سست ہونے کی کئی تکنیکی وجوہات ہیں جن میں کیبل کی کوالٹی، ڈیجیٹل ٹریفک میں اضافہ اور موسمیاتی تبدیلیاں شامل ہیں۔ تاہم، بعض ذرائع کا کہنا ہے کہ سیفٹی فائر وال کے تجربے کے باعث انٹرنیٹ سروسز میں خرابی آئی ہے۔

سیفٹی فائر وال کا مقصد سوشل میڈیا پر غیر قانونی سرگرمیوں کو روکنا اور آن لائن سیکورٹی کو بہتر بنانا ہے۔ اس کے ذریعے سوشل میڈیا پر غیر معمولی سرگرمی کرنے والے صارفین کو آسانی سے ٹریس کیا جا سکتا ہے۔

پی ٹی اے کی جانب سے ابھی تک انٹرنیٹ سروسز میں خرابی کے حوالے سے کوئی رسمی بیان جاری نہیں کیا گیا ہے۔

بعض ذرائع کا کہنا ہے کہ سیفٹی فائر وال کے دوسرے کامیاب تجربے کے بعد تمام سوشل میڈیا پلیٹ فارمز معمول کے مطابق کام کرنا شروع کر دیں گے اور انٹرنیٹ سروسز مکمل طور پر بحال ہو جائیں گی۔