نصرت فتح علی خان کو مداحوں سے جدا ہوئے 27 سال ہو گئے

لاہور : موسیقی کے بے تاج بادشاہ اور قوالی کے شہنشاہ نصرت فتح علی خان کو آج اپنے مداحوں سے بچھڑے 27 برس ہو گئے ہیں ۔

 13 اکتوبر 1948 کو فیصل آباد میں پیدا ہونے والے نصرت فتح علی خان نے قوالی کو ایک نئی بلندی پر پہنچا دیا۔ انہوں نے اپنے طویل کیریئر کے دوران عارفانہ کلام، گیتوں، غزلوں اور قوالیوں سے دنیا کو اپنا گرویدہ بنائے رکھا۔

نصرت فتح علی خان نے مغربی سازوں کو استعمال کر کے قوالی کو جدت کے ساتھ ساتھ ایک نئی جہت بخشی۔ ان کی قوالی ’دم مست قلندر علی علی‘ کو عالمی مقبولیت حاصل ہوئی۔ ان کی دیگر مشہور قوالیوں میں ’میری زندگی ہے تو‘، ’کسی دا یار نا وچھڑے‘، ’تم اک گورکھ دھندا ہو‘ اور ’اللہ ھو اور وہی خدا ہے‘ شامل ہیں۔

نصرت فتح علی خان نے قوالی کے 125 سے زائد آڈیو البم جاری کیے اور انہیں پرائیڈ آف پرفارمنس سمیت متعدد ملکی اور عالمی ایوارڈز سے بھی نوازا گیا۔ انہیں گینز بک آف ورلڈ ریکارڈ میں بھی شامل کیا گیا۔

16 اگست 1997 کو لندن میں دل کا دورہ پڑنے کے بعد انہوں نے دنیا کو خیرباد کہا لیکن ان کی آواز آج بھی لاکھوں دلوں میں گونجتی رہے گی۔