عمران خان کی سہولت کاری کے الزام میں زیر تحویل سابق جیل افسر رہا

راولپنڈی: اڈیالہ جیل کے سابق ڈپٹی سپرنٹنڈنٹ ظفر اقبال کو مبینہ طور پر عمران خان کی سہولت کاری کے الزام میں تحویل میں لینے کے بعد رہا کر دیا گیا ہے۔ 

ذرائع کے مطابق 13 اگست کو ظفر اقبال کو تفتیش کے لیے تحویل میں لیا گیا تھا۔ جمعہ کی سہ پہر اچانک اڈیالہ جیل کے قریب اپنی رہائش گاہ پر پہنچے۔ ظفر اقبال کی رہائش گاہ پر پہنچنے کے بعد لاپتہ اسسٹنٹ ناظم شاہ کی فیملی نے ان سے ملاقات کی، ظفر اقبال نے ناظم شاہ کے بارے میں لاعلمی کا اظہار کیا۔

ذرائع کا کہنا ہے کہ اڈیالہ جیل میں عمران خان کی مبینہ سہولت کاری کے شبے میں دو افسران سے پوچھ گچھ کی تھی۔ ان افسران میں ظفر اقبال اور اسسٹنٹ ناظم شامل ہیں۔ 14 اگست کوسابق ڈپٹی سپرنٹنڈنٹ اڈیالہ جیل محمد اکرم کو بھی عمران خان کیلئے پیغام رسانی اور سہولت کاری کے الزام میں حراست میں لیا گیا تھا۔

دوسری جانب سابق آئی جی جیل خانہ جات پنجاب مرزا شاہد سلیم بیگ نے اپنے گھر پہنچنے کے بعد حساس اداروں کی جانب سے حراست میں لیے جانے کی تردید کی ہے۔ انہوں نے ایک ویڈیو پیغام میں کہاکہ اپنے ہی گھر میں اپنی گرفتاری کی خبر چائے کی چسکی لیتے ہوئے سُن رہا ہوں۔ یہ زرد صحافت ہے اور اس کی کوئی حقیقت نہیں۔