شیر افضل مروت نے پارٹی سے اختلافات ختم کرنے اعلان کر دیا

راولپنڈی: شیر افضل مروت نے پی ٹی آئی کے ساتھ اپنے اختلافات ختم کرنے کا اعلان کر دیا ہے۔ 

اڈیالہ جیل کے باہر میڈیا سے گفتگو کرتے ہوئے شیر افضل مروت نے کہا کہ آج تین ماہ بعد پی ٹی آئی کے بانی سے ملاقات کرنے میں کامیاب ہوئے، جس کے دوران بانی پی ٹی آئی سے ہاتھ ملایا اور گلے لگایا۔ 

شیر افضل مروت نے بتایا کہ ملاقات کے دوران دونوں طرف سے گلے شکوے اور تحفظات کا تبادلہ ہوا، جس کے نتیجے میں اختلافات حل کر لیے گئے ہیں۔ انہوں نے کہا کہ بیرسٹر گوہر کے سامنے 22 اگست کے جلسے کے حوالے سے انہیں اہم ذمہ داری سونپی گئی ہے۔

مروت نے مزید وضاحت کرتے ہوئے کہا کہ بانی پی ٹی آئی کے کہنے پر پارٹی کے ساتھ اختلافات ختم کر رہے ہیں اور پارٹی رہنماؤں کے حوالے سے دیے گئے اپنے پچھلے ریمارکس پر معذرت خواہ ہوں۔ 

شیر افضل مروت نے اس بات پر بھی زور دیا کہ اب وہ مکمل طور پر پارٹی کے ساتھ یکجہتی اور ہم آہنگی کے ساتھ کام کریں گے، اور ان کی توجہ پارٹی کی ترقی اور اس کے مقاصد کے حصول پر مرکوز ہوگی۔