ہارٹ اٹیک نہیں ہوابلکہ بلڈ پریشر بڑھا تھا، آئمہ بیگ کی وضاحت

لاہور: معروف پاکستانی گلوکارہ آئمہ بیگ نے حال ہی میں سوشل میڈیا پر اپنے صحت کے حوالے سے کی گئی پوسٹ کے بارے میں وضاحت جاری کی ہے۔ چند روز قبل آئمہ بیگ نے انسٹاگرام پر ایک پوسٹ شیئر کی تھی جس میں انہوں نے بتایا تھا کہ انہیں مسلسل کام اور نیند کی کمی کی وجہ سے منی ہارٹ اٹیک ہوا ہے۔ ان کی اس پوسٹ کے بعد مداحوں میں تشویش کی لہر دوڑ گئی تھی۔

تاہم اب آئمہ بیگ نے ایک نئی پوسٹ کے ذریعے واضح کیا ہے کہ انہیں منی ہارٹ اٹیک نہیں ہوا تھا بلکہ ان کا بلڈ پریشر خطرناک حد تک بڑھ گیا تھا۔ انہوں نے بتایا کہ مسلسل سفر، نیند کی کمی اور غیر صحت مند غذا کی وجہ سے ان کا جسم بہت کمزور ہو گیا تھا جس کی وجہ سے ان کا بلڈ پریشر 88 سے 200 تک بڑھ گیا۔

آئمہ بیگ نے اپنے مداحوں کا شکریہ ادا کرتے ہوئے کہا کہ آپ کی دعاؤں کی بدولت وہ اب مکمل طور پر صحت یاب ہو چکی ہیں۔ انہوں نے کہا کہ انہیں نہیں معلوم تھا کہ لوگ ان سے اتنی محبت کرتے ہیں۔

آئمہ بیگ نے اپنی پوسٹ کے ذریعے لوگوں کو اپنی صحت کا خیال رکھنے کی تلقین کی ہے۔ انہوں نے کہا کہ کام اور زندگی کی مصروفیات میں ہم اکثر اپنی صحت کو نظر انداز کر دیتے ہیں لیکن یہ بہت ضروری ہے کہ ہم اپنی صحت کا خیال رکھیں۔