بانی پی ٹی آئی اور بشریٰ بی بی کا 14 روزہ جوڈیشل ریمانڈ منظور

راولپنڈی میں اڈیالہ جیل میں احتساب عدالت نے بانی چیئرمین پاکستان تحریک انصاف (پی ٹی آئی) عمران خان اور ان کی اہلیہ بشریٰ بی بی کے خلاف توشہ خانہ کے نئے ریفرنس میں 14 روزہ جوڈیشل ریمانڈ کی منظوری دے دی ہے۔ 

تفصیلات کے مطابق سابق وزیراعظم عمران خان اور بشریٰ بی بی کو آج 11 روزہ جسمانی ریمانڈ کے بعد عدالت میں پیش کیا گیا۔ دوران سماعت نیب (قومی احتساب بیورو) نے دونوں ملزمان کے مزید جسمانی ریمانڈ کی استدعا نہیں کی۔ 

نیب کی جانب سے پیش کی گئی درخواست کے بعد احتساب عدالت کے جج ناصر جاوید رانا نے فیصلہ سناتے ہوئے دونوں ملزمان کو اڈیالہ جیل میں 14 روزہ جوڈیشل ریمانڈ پر بھیجنے کا حکم جاری کیا۔

بانی پی ٹی آئی عمران خان اور بشریٰ بی بی نے نیب کے سوالنامے کا تحریری جواب عدالت میں جمع کرادیا۔ ان کے وکیل بیرسٹر سلمان صفدر نے عدالت کے سامنے دفاعی دلائل پیش کیے جبکہ نیب کے پراسیکیوٹر جنرل سردار مظفر عباسی بھی عدالت میں موجود تھے۔

احتساب عدالت نے توشہ خانہ کے نئے ریفرنس کی سماعت کرتے ہوئے فیصلہ کیا ہے کہ دونوں ملزمان کو 2 ستمبر کو دوبارہ عدالت میں پیش کیا جائے گا۔

یاد رہے کہ 8 اگست کو سماعت کے دوران احتساب عدالت اسلام آباد نے نئے توشہ خانہ ریفرنس میں پاکستان تحریک انصاف (پی ٹی آئی) کے بانی، سابق وزیر اعظم عمران خان اور بشریٰ بی بی کے جسمانی ریمانڈ میں مزید 11 روز کی توسیع کی تھی۔