داسوڈیم پراجیکٹ سے ملک کو سستی بجلی ملے گی: وزیراعظم

تفصیلات کے مطابق وزیراعظم عمران خان نے دورہ داسو ڈیم پر تقریب سے خطاب میں کہا کہ داسو ڈیم کی تعمیر میں پاکستانی اور غیرملکی ورکرز کو خوش آمدید کہتا ہوں۔انہوں نے کہا کہ ٹنل میں کام کرنا بہت مشکل ہے، یہاں کام کرنے والے تمام لوگوں کو خراج تحسین پیش کرتا ہوں۔ میں سمجھتاتھا دیامیر بھاشہ بہت بڑا پراجیکٹ ہے ،لیکن یہ اندازہ نہیں تھا  کہ یہ کتنا مشکل اور پاکستان کو فائدہ دینے والا پراجیکٹ ہے ۔

وزیراعظم عمران خان نے کہا کہ مہنگی بجلی ہرطرح سے مہنگائی  لاتی  ہے، سستی بجلی سے  ہماری انڈسٹری کو  فائدہ ہوگا۔انہوں  نے کہا کہ 50 سال پہلے بجلی سستی تھی، انڈسٹری تیزی سے اوپر جارہی تھی۔ انہوں نے  مزید کہاکہ  جس صورتحال میں آپ لوگ کام کررہے ہیں آپ کو خراج تحسین پیش کرتا ہوں پورا پاکستان آپ کیساتھ ہے۔

واضح رہے کہ صوبہ خیبر پختون خوا کے پسماندہ ترین ضلع اپر کوہستان میں داسو ڈیم کی تعمیر کا کام تیزی سے جاری ہے۔ اپر کوہستان میں شاہراہِ قراقرم کے کنارے بننے والے داسو ہائیڈرو پاور پراجیکٹ کی تعمیر کا کام اپریل 2025ء میں مکمل ہونے کی توقع ہے ،  جس سے قومی گرڈ میں 2160 میگا واٹ بجلی شامل ہوگی۔ یہ استعداد 2029 تک اپنے دوسرے مرحلے کی تکمیل کے ساتھ 4320 میگا واٹ ہوجائے گی۔