اٹک میں نامعلوم افراد کی سکول وین پر فائرنگ: دو بچے جاں بحق

اٹک :پنجاب کے ضلع اٹک کے علاقے ڈھیری کوٹ میں آج ایک دل دہلا دینے والے واقعے میں نامعلوم افراد نے سکول وین پر فائرنگ کر دی جس کے نتیجے میں دو بچے جاں بحق اور چھ زخمی ہو گئے۔

واقعے کے وقت سکول وین ڈھیری کوٹ گاؤں سے بچوں کو لے کر سرخ گاؤں کے سکول جا رہی تھی۔ فائرنگ کے بعد ملزمان موقع سے فرار ہو گئے۔ زخمی بچوں کو فوری طور پر قریبی ہسپتال منتقل کر دیا گیا ہے جن کی عمر تقریباً 10 سے 12 سال کے درمیان بتائی جاتی ہے۔

اس المناک واقعے پر وزیر اعلیٰ پنجاب مریم نواز شریف نے فوری طور پر نوٹس لیتے ہوئے کمشنر راولپنڈی سے رپورٹ طلب کر لی ہے۔ انہوں نے زخمی بچوں کو بہترین طبی سہولیات فراہم کرنے کی ہدایت کی ہے اور دو طالبات کے جاں بحق ہونے پر گہرے رنج و دکھ کا اظہار کیا ہے۔

پولیس نے واقعے کی جائے وقوعہ کو گھیرے میں لے لیا ہے اور ملزمان کی گرفتاری کے لیے سرگرم عمل ہے۔ ابتدائی تحقیقات کے مطابق یہ واقعہ کسی ذاتی دشمنی کا نتیجہ لگتا ہے تاہم پولیس تمام پہلوؤں سے تحقیقات کر رہی ہے۔

وفاقی وزیرداخلہ محسن نقوی نے اٹک میں سکول وین پر فائرنگ کے واقعہ کی مذمت کرتے ہوئے کہا ہے کہ بربریت کا مظاہرہ کرنے والے کسی رعایت کے مستحق نہیں۔

جمعرات کو وزارت داخلہ کے میڈیا ونگ سے جاری کردہ بیان کے مطابق وزیرداخلہ محسن نقوی نے فائرنگ سے 2 بچوں کے جاں بحق ہونے پر دکھ اور افسوس کا اظہاراور ان کے لواحقین سے دلی ہمدردی و اظہار تعزیت کیا۔

وزیرداخلہ محسن نقوی نے زخمی بچوں کی جلد صحتیابی کیلئے دعاکی۔وزیرداخلہ نے کہا کہ معصوم بچوں کو نشانہ بنانے والے انسان کہلانے کے حقدار نہیں۔ سکول وین میں موجود بچوں پر فائرنگ درندگی ہے ۔ محسن نقوی نے کہا کہ بربریت کا مظاہرہ کرنے والے کسی رعایت کے مستحق نہیں۔