سیکیورٹی فورسزکی شمالی وزیرستان میں کارروائی ، دو دہشت گرد ہلاک

پاک فوج کے شعبۂ تعلقاتِ عامہ (آئی ایس پی آر) کی جانب سے جاری اعلامیے کے مطابق سیکیورٹی فورسز نے شمالی وزیرستان کے علاقے اسپین وام میں خفیہ اطلاعات پر دہشت گردوں کو پکڑنے کےلیے آپریشن کیا۔

سیکیورٹی فورسز کے پہنچتے ہی مسلح دہشت گردوں نے اہلکاروں پر اندھا دھند فائرنگ کی۔

سیکیورٹی فورسز کے اہلکاروں نے جوابی فائرنگ کی، جس کے تبادلے میں  کالعدم تنظیم تحریک طالبان پاکستان (ٹی ٹی پی) کے سرگرم دہشت گرد مارے گئے۔

ترجمان پاک فوج کے مطابق مارے جانے والے دونوں دہشت گردوں کا تعلق کالعدم تنظیم ٹی ٹی پی سے تھا، جو جرائم کی سنگین وارداتوں میں بھی ملوث تھے۔

آپریشن کے دوران دہشت گردوں کی فائرنگ سے  نائک نزاکت حسین نے جامِ شہادت نوش کیا۔