میری ٹائم سکیورٹی تجارت کیلئے اہم، بلیو اکانوی سے روزگار کے مواقع پیدا ہونگے، اسحاق ڈار

نائب وزیراعظم و وزیر خارجہ اسحاق ڈار نے کہا کہ میر ی ٹائم سکیورٹی تجارت کیلئے اہمیت کی حامل ہے۔  بلیو اکانومی سے پاکستان میں معاشی استحکام آئے گا، بلیو اکانومی سے روزگار کے مواقع پیدا ہوں گے۔

اسلام آباد میں بین الاقوامی میری ٹائم کانفرنس سے خطاب کرتے ہوئے نائب وزیر اعظم و وزیر خارجہ اسحاق ڈار نے کہا ہے کہ دور حاضر کے تقاضوں کے مطابق میری ٹائم کانفرنس کا انعقاد بہت ضروری تھا، پاکستان کی بلیو اکانومی ملکی ترقی کے لیے عالمی سطح پر اہم کردار ادا کرسکتی ہے، بلیو اکانومی کے فروغ کے لیے اقدامات ضروری ہیں، ایس آئی ایف سی کے تحت ماہی گیری کے شعبے کو خاص اہمیت حاصل ہے۔

ان کا کہنا تھا کہ میری ٹائم افیئرز سے متعلق سب کے مفاد مشترک ہیں، حکومت ماہی گیری کے شعبے کو جدید تقاضوں سے ہم آہنگ کرنے کے لیے اقدامات کر رہی ہے، ماہی گیری کے لیے بیچ اور خوراک کا درست طریقہ کار کے تحت انتظام ضروری ہے۔

نائب وزیراعظم نے کہا ہے کہ ملکی و غیر ملکی سرمایہ کاروں کیلئے آسانیاں پیدا کررہے ہیں، میری ٹائم انڈسٹری میں سرمایہ کاری کرنے والوں کی حوصلہ افزائی کریں گے۔سمندری ترقی کے لئے عالمی شراکت داری ضروری ہے، بحری  امور میں جدید رحجانات کو فروغ دینے کی ضرورت ہے۔

اسحاق ڈار نے اپنے خطاب میں مزید کہا ہے کہ معیشت کی بحالی کیلئے کوششیں جاری ہیں، میری ٹائم انڈسٹری کی ڈی کاربنائزیشن جاری ہے، مستقبل میں پاکستان کی بندرگاہوں پر نمایاں ترقی دیکھنے کو ملے گی۔