بانی چیئرمین کی صحت سے متعلق تشویشناک خبریں موصول ہو رہی ہیں، بیرسٹر سیف

مشیر اطلاعات خیبرپختونخوا بیرسٹر ڈاکٹر سیف نے کہا ہے کہ بانی چیئرمین پی ٹی آئی عمران خان کی صحت سے متعلق تشویشناک خبریں موصول ہو رہی ہیں۔

اپنے ایک بیان میں بیرسٹر سیف کا کہنا تھا کہ عمران خان سے ملاقاتوں پر پابندی سے کارکنان میں انتہائی تشویش ہے، کیا وجہ ہے کہ حراست میں شخص سے ملاقاتوں پر پابندی لگائی گئی، ہمارے ریسکیو اور پولیس اہلکاروں کو بھی غیر قانونی حراست میں رکھا جا رہا ہے۔ اطلاعات موصول ہو رہی ہیں کہ غیر قانونی طور پر حراست میں سرکاری اہلکاروں اور پی ٹی آئی ورکرز پر تشدد کیا جا رہا ہے۔

بیرسٹر سیف نے کہا کہ تشدد کی تصدیق کے بعد ذمہ دار  اہلکاروں کو نشان عبرت بنائیں گے۔ خیبرپختونخوا اسمبلی اراکین ملک لیاقت اور انور زیب خان کو بھی غیر قانونی طور پر پابند سلاسل رکھا گیا ہے۔ صوبائی کابینہ کے رکن ملک لیاقت کو بھی غیر قانونی طور پر حراست میں رکھا گیا ہے۔شریف خاندان کی ناجائز حکومت انسانی حقوق کی سنگین خلاف ورزیاں کر رہی ہیں۔

صوبائی مشیر اطلاعات کا کہنا تھا کہ وفاقی حکومت نے کے پی ہاؤس اسلام آباد میں بھی توڑ پھوڑ کی ہے۔اس قسم کے اقدامات ناقابل برداشت اور فیڈریشن پر حملہ ہے۔غیر قانونی طور پر اختیارات کے استعمال کے مرتکب اہل کاروں کو کسی صورت معاف نہیں کریں گے۔

انہوں نے کہا کہ اگر ہمارے صوبے سے تعلق رکھنے والوں پر تشدد کیا جائے گا تو ہم بھی اینٹ کا جواب پتھر سے دیں گے۔ ہم ریاستی جبر کے خلاف تمام قانونی اور سیاسی پلیٹ فارمز پر لڑیں گے۔