اے این پی کے سابق ترجمان اور سینیٹر زاہد خان نے مسلم لیگ (ن) میں شامل

عوامی نیشنل پارٹی (اے این پی) کے سابق ترجمان اور سینیٹر زاہد خان نے مسلم لیگ (ن) میں شمولیت اختیار کرلی۔

عوامی نیشنل پارٹی کے سابق ترجمان زاہد خان نے لوئر دیر میں اپنی رہائش گاہ پر مسلم لیگ (ن) کے صوبائی صدر امیر مقام کی موجودگی میں شمولیت کا اعلان کیا۔

سابق اے این پی رہنما نے مسلم لیگ (ن) میں شمولیت کا فیصلہ پارٹی کے صدر میاں نواز شریف سے براہ راست رابطوں کے بعد کیا۔

واضح رہے کہ زاہد خان نے سمتبر میں عملی سیاست سے کنارہ کشی اختیار کرنے کا اعلان کیا تھا اور کہا تھا کہ نظریات اور سوچ کے ساتھ سیاست کر رہے تھے، بدقسمتی سے ملک میں جو سیاست سے چل رہی ہے، اس میں نظریات کہیں نہیں ہیں۔

انہوں نے کہا تھا کہ ہم نے سیاست میں بڑی قربانیاں دی ہیں، موجودہ حالات میں مزید سیاست نہیں کر سکتا، مستقبل کا فیصلہ اپنے حلقے کے لوگوں کے ساتھ مشاورت کے بعد کروں گا۔

یاد رہے کہ مئی میں زاہد خان نے پارٹی قیادت سے مبینہ اختلافات کے سبب پارٹی کے ترجمان کا عہدہ چھوڑنے کا اعلان کیا تھا، انہوں نے عوامی نیشنل پارٹی کے ترجمان کا عہدہ چھوڑنے کے ساتھ ساتھ انٹرا پارٹی الیکشن میں بھی حصہ نہ لینے کا فیصلہ کیا تھا۔