مولانا فضل الرحمان کا وزیراعظم سے ٹیلیفونیک رابطہ، مدارس رجسٹریشن بل پر تحفظات سے آگاہ کیا

مولانا فضل الرحمٰن اور وزیراعظم شہباز شریف کے درمیان ٹیلی فونک رابطہ ہوا ہے، جس  میں مولانا کی جانب سے  مدارس رجسٹریشن بل پر تحفظات کا اظہار کیا گیا۔

ترجمان  جے یو آئی ف  کے مطابق مولانافضل الرحمان نے وزیراعظم کو مدارس رجسٹریشن بل پر تحفظات سےآگاہ کیا  جس پر شہباز شریف نے بل پر تمام تحفظات دور کرنے کی یقین دہانی کرائی۔

ترجمان کے مطابق مولانا فضل الرحمان کا کہنا تھا کہ حکومت متفقہ بل کو متنازعہ بنانے سے گریز کرے ،مدارس سے متعلق ہم اپنے مؤقف پر قائم ہیں اور مدارس کی آزادی پر کوئی آنچ نہیں آنے دی جائے گی۔

دوسری جانب جے یو آئی کے رہنما حافظ حمداللہ نے کہا ہے کہ صدر آصدف زرداری نے مدارس رجسٹریشن بل کو مسترد کرکے طبل جنگ بجا دیا ، بل مسترد کرنا پارلیمنٹ جمہوریت اور آئین کے چہرے پر زوردار طمانچہ ہے۔

انہوں نے کہا کہ بل مسترد کرنے کے ذمہ دار صدر کے ساتھ ساتھ شہباز شریف اور بلاول بھی ہیں، واضح رہے کہ اس صدر آصف علی زرداری نے مدارس رجسٹریشن کا بل اعتراض لگاکر واپس بھجوادیا تھا۔

اس سے قبل جمیعت علماء اسلام کے رہنما مولانا عبد الغفور حیدری نے حکومت کو 8 دسمبر کی ڈیڈ لائن دیتے ہوئے تنبیہ کی ہے کہ اگر بل منظور نہیں کیا گیا تو اسلام آباد کا رخ کریں گے۔