مقبوضہ کشمیر میں بھارتی ریاستی دہشتگردی کی تازہ کارروائی، نوجوان شہید

تفصیلات کے مطابق مقبوضہ کشمیرمیں  بھارتی فوج کاتشدداورجارحیت جاری ہے اور ضلع  سری نگر  میں  ایک اور کشمیری نوجوان کو شہید کر دیا گیا ہے۔ گزشتہ  24 گھنٹوں میں شہداکی تعداد دو ہوگئی ہے ۔  مقبوضہ کشمیر کے علاقے پرمپورہ     میں قابض بھارتی فوج نے گھر گھر تلاشی  لی ، آخری اطلاعات آنے تک آپریشن جاری  ہے ۔  پیر کو اسی علاقے میں ایک  کشمیری نوجوان کو بھارتی فوجیوں نےشہید کیا تھا۔ علاقے میں سرچ آپریشن کے دوران ہندوستانی سنٹرل ریزرو پولیس فورس (سی آر پی ایف) کے دو اہلکار اور ایک فوجی  بھی زخمی ہوا۔

دوسری جانب اقوام متحدہ  نے بھارت سے مقبوضہ کشمیر میں بچوں کے خلاف پیلٹ گن کا استعمال روکنے کا مطالبہ کیا ہے ۔

واضح رہے کہ بھارت نے مقبوضہ کشمیر میں   ظلم وبربریت کا بازار گرم کر رکھا ہے ،  کئی دہائیوں سے بھارت  مقبوضہ کشمیر میں جاری آزادی کی تحریک کو دبانے   کی کوشش کر رہا ہے اور گزشتہ سال 200 سے زائد  افراد کو شہید کیا گیا ہے۔جبکہ ہزاروں کشمیریوں سمیت مقبوضہ وادی کی سیاسی قیادت کو بھی جیلوں میں بند کر رکھا ہے۔

 5اگست 2019 کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل 370 اے کو ختم کر کے مقبوضہ وادی میں کرفیو نافذ کر دیا تھا اور بھارت نے کشمیریوں کی نقل وحرکت پر پابندی عائد کر رکھی ہے۔ 

یکم نومبر سے بھارتی آئین کے آرٹیکل 35 اے   کے خاتمے سے بھارتی شہریوں کو مقبوضہ کشمیر میں جائیداد خریدنے اور وہاں رہنے کا حق بھی حاصل ہو گیا ہے۔ بھارتی آئین کے آرٹیکل 35 اے کے تحت مقبوضہ کشمیر کو بھارت میں خصوصی درجہ حاصل ہے جس کے تحت صرف کشمیری ہی وادی میں جائیداد خریدنے اور ورثے میں منتقل کرنے کا حق رکھتے ہیں۔