مراکش میں تارکین وطن کی کشتی ڈوبنے سے 69 افراد ہلاک

افریقی ملک مراکش کے ساحل پر تارکین وطن کی کشتی الٹنے سے کم از کم 69 افراد ہلاک ہو گئے،ہلاک ہونے والوں 25 افراد کا تعلق افریقی ملک مالی سے تھا۔ 
غیر ملکی میڈیا رپورٹس کے مطابق تارکین وطن کی کشتی کوحادثہ 19 دسمبر کو پیش آیا، حادثے کا شکار ہونے والی کشتی میں تقریباً 80 افراد سوار تھے جو خطرناک سفر کے دوران ڈوب گئی، بد قسمت کشتی میں سوار صرف 11 افراد زندہ بچ پائے۔
مالی حکام کا کہنا ہے کہ بیرون ملک مالی شہریوں کی وزارت نے صورتحال پر نظر رکھنے کے لیے کرائسس یونٹ قائم کردیا گیا ہے۔
متاثرین میں سے اکثر کا تعلق مالی کے مغربی علاقے کائیس سے تھا جہاں سے وہ تعمیراتی صنعت میں کام کی تلاش کے لیے موریطانیہ ہجرت کر گئے تھے۔
میڈیا رپورٹس کے مطابق یورپ اور امریکا میں موجود اپنے دوستوں کے ساتھ بات چیت کے بعد متاثرین نے حوصلہ پایا کہ وہ خطرناک سفر اختیار کریں جب کہ ان میں سے کچھ نے اپنے گھر والوں کو بتائے بغیر ہی خطرناک سفر کیا۔
واضح رہے کہ مائیگریشن حقوق کے گروپ واکنگ بارڈرز کے مطابق سال 2024 کے پہلے پانچ مہینوں میں تقریباً 5 ہزارتارکین وطن سمندر میں ڈوبنے سے ہلاک ہوئے،ادارے کی رپورٹ کے مطابق ہلاک ہونے والوں کی یہ تعداد بہتر مستقبل کی تلاش میں بحر اوقیانوس کو عبور کرنے کی کوشش کرنے والوں کو درپیش بڑھتے ہوئے خطرات کی نشاندہی کرتی ہے۔