پاکستان پر جو بھی دباؤ آئے چین سے تعلقات تبدیل نہیں ہوں گے : وزیر اعظم عمران خان

تفصیلات کے مطابق وزیر اعظم عمران خان نے غیر ملکی میڈیا کو انٹرویو دیتے ہوئے کہا کہ پاکستان کے لیے چین کی خصوصی اہمیت ہے اور چین نے ہمیشہ برے وقت میں پاکستان کا ساتھ دیاہے۔ لوگ برے وقت میں ساتھ دینے والوں کو یاد رکھتے ہیں۔

وزیر اعظم کا کہنا تھا کہ پاک چین تعلقات صرف حکومتی سطح پر نہیں بلکہ عوامی سطح پر بھی ہموار ہیں۔

انہوں نے کہا کہ امریکہ اور چین میں مخاصمت بڑھ رہی ہے جبکہ امریکہ اور یورپی ملک چاہتے ہیں کہ ہم کسی ایک گروپ کا ساتھ دیں۔

وزیر اعظم نے کہا کہ ہمیں کسی کے گروپ میں جانے کی ضرورت نہیں بلکہ ہم سب کے ساتھ تعلق رکھنا چاہتے ہیں۔ جو بھی دباؤ آئے پاکستان اور چین کے تعلقات تبدیل نہیں ہوں گے۔

انہوں نے مزید کہا کہ ہم چین کے ساتھ تجارت بڑھانا چاہتے ہیں ، پاکستان سب کے ساتھ اچھے تعلقات چاہتا ہے ، ہم جانبدار کیوں بنیں اور سی پیک پاکستان کے معاشی مستقبل کے لیے اہم ہے۔