عالمی منڈی میں کمی کے اثرات، پیٹرولیم مصنوعات کی قیمتوں میں رد و بدل کا امکان 

ویب ڈیسک: عالمی منڈی میں تیل کی قیمتوں میں کمی کے باعث پیٹرول کی قیمت میں اضافہ جبکہ ڈیزل کی قیمت میں کمی کا امکان ہے۔  جس کے پیش نظر 16 اگست سے آئندہ 15 دن کے لیے پاکستان میں پیٹرولیم مصنوعات کی قیمتوں میں رد و بدل کا امکان ہے۔

ذرائع کے مطابق متعلقہ حکام نے ہائی اسپیڈ ڈیزل( HSD)کی قیمت میں 11 روپے 75 پیسے فی لیٹر کمی کا تخمینہ لگایا ہے جس کے بعد ہائی اسپیڈ ڈیزل کی نئی قیمت 282 روپے 83 پیسے سے کم ہو کر 274 روپے 08 پیسے فی لیٹر ہونے کا امکان ہے۔

ذرا ئع کا کہنا ہے کہ اوگرا 15 اگست کو حتمی سمری وزارت پیٹرولیم کو ارسال کرے گی جس کے بعد وزیر خزانہ اور وزیر اعظم کی مشاورت سے اگلے 15 دن کے لیے قیمتوں کا با ضابطہ اعلان کیا جا ئے گا۔

دوسری جانب پیٹرول کی قیمت میں 1 روپے 32 پیسے فی لیٹر اضافے کی تجویز پیش کی گئی ہے۔ اسی طرح مٹی کے تیل کی قیمت میں 6 روپے 25 پیسے اور لائٹ ڈیزل آئل کی قیمت میں 7 روپے 11 پیسے فی لیٹر کمی متوقع ہے۔

عالمی توانائی ایجنسی کی جانب سے جاری رپورٹ میں اس سال اور آئندہ سال تیل کی اضافی مقدار میں اضافہ متوقع قرار دیا گیا ہے، جس کے نتیجے میں خام تیل کے فیوچرز دو ماہ کی کم ترین سطح پر آ گئے ہیں اور 62.7 ڈالر فی بیرل تک گر گئے ہیں۔