گوجرانوالہ میں دوسالہ بچے کی قاتل ہمسائی نکلی

رپورٹ :  رانا مجاہد

تفصیلات کے مطابق  گوجرانوالہ میں دوسالہ بچے کی قاتل ہمسائی نکلی، ملزمہ رامین اویس نے بچے کو اغواء کرکے اس کے والدین سے نوے لاکھ روپے تاوان طلب کیا، عدم ادائیگی پر گلا دبا کر بچے کو قتل کردیا۔  گرفتاری کے بعد ملزمہ نے اعتراف جرم بھی کرلیا۔

تھانہ اروپ کی حدود میں پولیس نےدوسالہ بچے کے اغواء کے بعد قتل کا سراغ لگا لیا۔ ایس ایس پی انویسٹی گیشن سید علی نے پریس کانفرنس کرتے ہوئے بتایا کہ معصوم بچے کو اس کی ہمسائی رامین اویس نے اغوا ءکیا  اور میسیج کے ذریعے اہلخانہ سے  90 لاکھ روپےتاوان کا مطالبہ کیا ، جو نہ ملنے پر خاتون نے بچے کی جان لے لی۔

پولیس کے مطابق خاتون نے دو سالہ عبدالہادی کو گلا دبا کر قتل کیا، اور صندوق میں بند کر کے قریبی گراؤنڈ میں پھینک دیا۔  پولیس نے سائنٹیفک انداز میں کارروائی کرتے ہوئے ملزمہ رامین اویس کو گرفتار کر لیا، ملزمہ نے دوران تفتیش اعتراف جرم بھی کرلیا۔

پولیس کا کہنا ہے کہ ملزمہ نے خود کو  مالدار ظاہر کرکے پسند کی شادی کی،  سسرالیوں کی جانب سے پیسے مانگنے پر کمسن بچے کو تاوان کے لیے اغواء کرلیا، مطالبہ پورا نہ ہونے پر معصوم بچے کی جان لے لی ۔