بانی پی ٹی آئی کو سزا مکافات عمل ہے،خواجہ آصف کا سزا پر ردعمل

سیالکوٹ :190ملین پاؤنڈز ریفرنس کیس کے فیصلے پر وزیر دفاع خواجہ آصف نےردعمل دیتے ہوئے کہا کہ بانی پی ٹی آئی کو سزا مکافات عمل ہے،انہوں نے کہا  190 ملین پاؤنڈز پاکستانی عوام کے پیسے تھے۔
سیالکوٹ میں میڈیا سے گفتگو کرتے ہوئے وزیر دفاع خواجہ آصف نے کہا کہ کیس میں سب کچھ واضح ہوگیا ہے، یہ اکاؤنٹ آج ڈیفالٹ میں ہے،انہوں نے کہا کہ جس القادر یونیورسٹی کے نام پر پیسے کھائے گئے ہیں اس یونیورسٹی کا وجود تو ہے ہی نہیں۔القادر ٹرسٹ ہائیرایجوکیشن سے منظور شدہ نہیں ہے۔
خواجہ آصف نے کہا کہ کابینہ میں بند لفافہ کیوں لہرایا گیا،ان کا کہنا تھا کہ حکومتی اکاؤنٹ میں آنے والا پیسہ کسی اورکے کھاتے میں ڈالا گیا، چوری کا مال ہڑپ کرنے کے لئے واردات ہو رہی تھی۔

وزیر دفاع نے کہا کہ بانی پی ٹی آئی نے قوم کے ساتھ ظلم کیا ہے ،ساڑھے 400 کنال زمین ہے جس کے ٹرسٹی بانی پی ٹی آئی اوربشریٰ بی بی ہیں، چار سال ہوگئے اور صرف 400 بچہ پڑھتا ہے۔
پریس کانفرنس میں خواجہ آصف کا کہنا تھا کہ چور چورکے نعرے لگانے والے خود ڈاکے میں ملوث نکلے،چوری کے مال پران کی آپس میں بھی لڑائی ہونی ہے،انہوں نے کہا کہ بانی پی ٹی آئی نے عوام کے ساتھ ظلم کیا، قوم کا پیسہ ذاتی اکاؤنٹ میں منتقل کیے جانے کی تاریخ میں مثال نہیں ملتی۔
خواجہ آصف نے کہا کہ جھوٹے الزام لگا کر نواز شریف کو سزا سنائی گئی، این سی اے نے تحقیقات کرکے حسن نواز کو کلین چٹ دی تھی۔