جی ایچ کیو گیٹ حملہ کیس کی سماعت 22 جنوری تک ملتوی

انسداد دہشت گردی عدالت نے جی ایچ کیو گیٹ حملہ کیس کی سماعت 22 جنوری تک ملتوی کردی۔

جی ایچ کیو گیٹ حملہ کیس کی سماعت آج اڈیالہ جیل میں انسداد دہشت گردی عدالت کے جج امجد علی شاہ نے کی جب کہ دوران سماعت مقدمہ میں مجموعی طور پر استغاثہ کے پانچ گواہان کی شہادت قلم بند کرلی گئی ہے، چشم دید گواہ نور خان نے آج اپنا بیان ریکارڈ کروایا، مجموعی طور پر اٹھارہ چشم دید گواہان کے بیان ریکارڈ کروائے جائیں گے۔

دوران سماعت بانی پی ٹی آئی، شیخ رشید اور شیخ راشد سمیت دیگر ملزمان عدالت میں پیش ہوئے، ملزمان کی جانب سے فیصل ملک، بابر اعوان اور سردار شہباز سمیت دیگر وکلاء بھی پیش ہوئے ، پراسیکیوشن کی جانب سے ظہیر شاہ اور نوید ملک عدالت میں موجود تھے، دو ملزمان کے وکلا کی غیر موجودگی کی وجہ سے عدالتی کارروائی میں وقفہ کرنا پڑا۔

سماعت کے دوران ملزمان سے برآمد مال مقدمہ بھی عدالت میں پیش کیا گیا، اے ایس آئی نور نے ملزمان سے برآمد ڈنڈے، لائٹر، ماچس اور جھنڈے عدالت پیش کیے۔

ملزمہ مسرت جمشید چیمہ کے وکیل ڈاکٹر علی عمران کو آج سماعت میں داخلے کی اجازت نہ ملی اور وکیل علی عمران کی جانب سے ساتھی وکلاء کی غیر مشروط معافی کی زبانی درخواست بھی عدالت نے منظور نہ کی۔

عدالت نے حکم دیا کہ وکیل ڈاکٹر علی عمران پہلے عدالت کے نوٹس کا تحریری جواب دیں، بعد ازاں جج امجد علی شاہ نے سماعت 22 جنوری تک ملتوی کردی۔