گوادر میں نئےتعمیر ہونے والے ائیر پورٹ  پر آج پہلی پرواز لینڈ کرے گی

گوادر: بلوچستان کے صنعتی شہر اور بندگارہ گوادر میں نئے تعمیر ہونے والے انٹرنیشنل ایئرپورٹ پر پروازوں کی آمد و رفت کا سلسلہ آج سے شروع ہو گا پاکستان انٹرنیشنل ایئرلائنز (پی آئی اے) کی پرواز نئے ایئرپورٹ پر اترنے والی پہلی پرواز ہو گی ۔۔
ترجمان پی آئی اے کا کہنا ہے کہ کراچی سے گوادر جانے والی پرواز پی کے 503 آج لینڈ کرے گی۔
کراچی کے جناح انٹرنیشنل ایئرپورٹ کی ویب سائٹ پر دستیاب فلائٹ شیڈول کے مطابق پرواز کی روانگی صبح 9 بج کر 20 منٹ پر متوقع تھی جو کہ تاخیر کا شکار ہو گئی ہے،مسافروں کے علاوہ ایوی ایشن ڈویژن کے سینئر افسران بھی افتتاحی پرواز میں موجودہوں گے۔
اس موقع پرپرواز کو لینڈنگ پر واٹر باؤزر سے روایتی واٹر سلامی دی جائے گی۔
وزیر دفاع و ہوابازی خواجہ آصف نئے ایئرپورٹ پر مسافروں کا استقبال کریں گے،اس موقع پر ایک مختصر تقریب منعقد کی جائے گی۔
گورنر بلوچستان جعفر خان مندوخیل، وزیر اعلیٰ سرفراز بگٹی، چیف سیکرٹری شکیل قادر خان، سیکرٹری ایوی ایشن ڈویژن احسن علی منگی، ڈی جی پی اے اے ایئر وائس مارشل ذیشان سعید، ایئرپورٹس سیکیورٹی فورس کے ڈی جی میجر جنرل عدنان آصف جاہ شاد اور سول ایوی ایشن اتھارٹی کے ڈی جی ندیم شاہد اور دیگر بھی تقریب میں شرکت کریں گے۔
واضح رہے کہ نئے ایئرپورٹ کا افتتاح وزیر اعظم شہباز شریف اور چینی وزیر اعظم لی کیانگ نے اکتوبر میں پاکستان کے دورے کے دوران کیا تھا۔