لوئر کرم میں فورسز کی شرپسندوں کے خلاف کارروائیاں ، کئی خاندان گھر چھوڑنے پر مجبور

لوئرکرم کےعلاقوں میں شرپسندوں کے خلاف کارروائیاں دوسرے روز بھی جاری ہیں۔

حکام کے مطابق لوئر کرم کے متاثرہ علاقوں سےاب تک 20 خاندان گھر خالی کر چکے ہیں، کچھ متاثرہ خاندان رشتے داروں کےگھر اورکچھ ہنگو منتقل ہوئے ہیں۔

ضلعی انتطامیہ کےمطابق کارروائیوں کےدوران علاقے میں کرفیو نافذ ہے، لوئر کرم کے متاثرہ علاقوں میں سکیورٹی فورسز اور پولیس کے دستے بھی موجود ہیں ، کمشنرکوہاٹ کا کہنا ہےکہ کرم میں کارروائیاں مقامی افراد کےخلاف نہیں بلکہ شرپسندوں کے خلاف کی جا رہی ہے، پشاور کرم شاہراہ بدستور تین ماہ سےبند ہےجس کی وجہ سے ادویات اوراشیائے خورونوش کی قلت ہے۔ 

کرم کےعلاقے بگن میں دہشتگردوں کے خلاف آپریشن کے متاثرین کےلیے ہنگو میں عارضی کیمپ قائم کرنے کا فیصلہ کیا گیا ہے۔

ڈی سی کا بتانا ہےکہ پی ڈی ایم اےخیموں سمیت دیگر سامان کے 22 ٹرک فراہم کرے گا، ضلعی انتظامیہ کو 4 ٹرک سامان مل گیا ہے اور آج سے کیمپ کے قیام پرکام شروع کر دیا جائے گا۔

ڈپٹی کمشنرہنگو گوہر زمان کے مطابق علاقہ محمد خواجہ میں بگن متاثرین کے لیے عارضی کیمپ قائم کیا جائےگا، سیکڑوں ایکڑ اراضی پرہزاروں خاندانوں کے لیے خیمہ بستی قائم کی جائے گی جبکہ کیمپ کے قریب اسکول، مساجد، بی ایچ یو اور دیگر سہولیات میسر ہیں۔