پی ٹی آئی کے جنید اکبر بلا مقابلہ چئیرمین پبلک اکاوّنٹ کمیٹی منتخب

اسلام آباد: پاکستان تحریک انصاف کےرکن قومی اسمبلی جنید اکبر بلا مقابلہ چیئرمین پبلک اکاؤنٹس کمیٹی منتخب ہوگئے ہیں۔
چیئرمین پبلک اکاؤنٹس کمیٹی کی نامزدگی کیلئے اجلاس ہوا جس میں ارکان نے شرکت کی۔
اجلاس میں مسلم لیگ ن کے ڈاکٹر طارق فضل چوہدری، اپوزیشن لیڈر عمر ایوب خان، سینیٹر شبلی فراز اور دیگر نے جنید اکبر خان کا نام تجویز کیا،ممبر قومی اسمبلی ریاض فتیانہ، ملک عامر ڈوگر،وجہیہ قمر، سردار محمد یوسف زمان اور دیگر ممبران نے جنید اکبر خان کے نام کی تائید کی۔
کمیٹی کے ممبران نے جنید اکبر خان کوچئیرمین منتخب ہونے پر مبارکباد پیش کی، جس کے جواب میں جنید اکبر خان نے متفقہ طور پر چیئرمین پبلک اکاؤنٹس کمیٹی (پی اے سی) منتخب کرنے پر ممبران کا شکریہ ادا کیا۔
اس موقع پر جنید اکبر کا کہنا تھا کہ وہ تمام ممبران کو ساتھ لے کر چلیں گے،جبکہ کمیٹی ممبران نے جنید اکبر خان کو کمیٹی کو چلانے پر اپنے ہر ممکن تعاون کا یقین دلایا۔
واضح رہے کہ عام انتخابات کےبعد حکومت کےقیام کو تقریباً ایک سال ہونےوالا ہے لیکن ابھی تک پبلک اکاؤنٹس کمیٹی کے چیئرمین کا تقرر نہیں ہو سکا تھا ،جبکہ اس سے قبل چئیرمین پبلک اکاوّنٹ کمیٹی کے لیے پاکستان تحریک انصاف کی جانب سےشیخ وقاص اکرم کو نامز د کیا گیا تھا،تاہم پی ٹی آئی نے بانی چئیرمین کی ہدایات پرشیخ وقاص اکرم کی جگہ اکبر خان کو نامزد کیا تھا