مختلف شعبوں اور اداروں کیلئے تین ارب روپے سے زائد کی گرانٹ کی منظوری

کابینہ کی اقتصادی رابطہ کمیٹی نے مختلف شعبوں اور اداروں کیلئے تین ارب روپے سے زائد کی گرانٹ کی منظوری دی ہے۔

وزیرخزانہ محمد اورنگزیب کی صدارت میں اسلام آباد میں کمیٹی کے اجلاس میں ہتھیاروں اور گولہ بارود کی دیداری اور ڈیجیٹل انفورسمنٹ سٹیشنز اور چیک پوسٹوں کے ڈیزائن کے حوالے سے مشاورت کیلئے نیسپاک کی خدمات لینے کیلئے دوارب اناسی کروڑ روپے کی منظوری دی گئی۔

فرنٹیئر کور خیبرپختونخوا نارتھ کیلئے بیرکس اور چوکیوں کی تعمیر کیلئے انچاس کروڑ پینتالیس لاکھ روپے سے زائد رقم کی منظوری دی گئی۔

انٹیلی جنس بیورو ڈویژن کیلئے بھی پچاس کروڑ روپے کی گرانٹ منظور کرائی گئی۔

ای سی سی نے گندم، چینی اور دالوں کے سٹرٹیجک ذخائر کو یقینی بنانے اور رمضان کے مقدس مہینے سے قبل ضروری اشیاء کی سپلائی Chain کو بہتر بنانے کی ہدایت کی۔

اجلاس میں صوبائی پرائس کنٹرول کمیٹیوں پر زور دیا گیا کہ وہ قیمتوں کے کنٹرول کے طریقہ کار پر عملدرآمد کریں، کارٹیلائزیشن اور ناجائز منافع خوری کو روکیں تاکہ صارفین کو قیمتوں میں غیر منصفانہ اضافے سے بچایا جاسکے۔

اس موقع پر وزیرخزانہ نے خطاب کرتے ہوئے کہا کہ بنیادی افراط زر، اوسط مہنگائی اور قیمتوں میں کمی کے رجحانات کو عام آدمی کیلئے ٹھوس ریلیف کا ترجمان ہونا چاہیے۔