مقبوضہ کشمیر میں آزادی کی تحریک تکمیل پاکستان کی جدو جہد ہے، طارق فضل چوہدری

مسلم لیگ ن کے رہنما طارق فضل چوہدری کہا کہ یوم یکجہتی کشمیر پاکستان سمیت دنیا بھر میں منایا جاتا ہے، مقبوضہ کشمیر میں آزادی کی تحریک تکمیل پاکستان کی جدو جہد ہے۔ کشمیریوں کو استصواب رائے کا حق نہ ملنے تک پاکستان نامکمل ہے۔

طارق فضل چوہدری نے کہا کہ مقبوضہ کشمیر میں انسانی حقوق کی سنگین خلاف ورزیاں کی جارہی ہیں، تحریک آزادی کے دوران لاکھوں کشمیریوں کو شہید کیا جا چکا ہے۔ ان ظلم و ستم کے باوجود بھی کشمیری عوام اپنے حق خودارادیت کے لیے جد وجہد کرتے ہوئے بھارتی مظالم کیخلاف بھر پور آواز بلند کر رہے ہیں اور کرتے رہیں گے۔

انہوں کا کہنا تھا کہ کشمیری عوام کو استصواب رائے کا بنیادی حق دیا جائے ۔ 5 فروری کا دن پاکستان کی جانب سے سفارتی محاذ پر کشمیریوں کی حمایت کا اظہار ہے۔ مقبوضہ کشمیر میں زیادتیوں پر ہم بین الاقوامی برادری کی آواز کے منتظر ہیں ۔ 15 اگست کو کشمیریوں کے حقوق پامال کیے گئے لیکن ہم اپنے مقبوضہ کشمیر کے بھائیوں کے ساتھ کھڑے ہیں۔ یوم یکجہتی کشمیر کو روایتی انداز سے آگے بڑھانے کا فیصلہ کیا ہے ۔

مسلم لیگی رہنما کا کہنا تھا کہ  اس بار شاہراہ دستور پر ایک بڑی واک منعقد کی جائے گی، اس کے ساتھ ساتھ پاکستان اور آزاد کشمیر میں سیمینار بھی منعقد کیے جائیں گے، دفتر خارجہ نے فارن مشنز کو بھی بھارتی مظالم پر سیمینارز کی ہدایات جاری کر دیں ہے، اس کے علاوہ یوم یکجہتی کشمیر پر صوبائی دارالحکومتوں میں انسانی ہاتھوں کی زنجیریں بنائی جائیں گی