سی ٹی ڈی کے پنجاب کے مختلف شہروں میں انٹیلی جنس بیسڈ آپریشن، 15 دہشتگرد گرفتار

کاؤنٹر ٹیررازم ڈیپارٹمنٹ (سی ٹی ڈی) نے پنجاب کے مختلف شہروں میں انٹیلی جنس بیسڈ آپریشن کرتے ہوئے 15 دہشتگردوں کو گرفتار کر لیا۔ سی ٹی ڈی کے ترجمان نے بتایا کہ کارروائیاں لاہور، سیالکوٹ، گجرات، اٹک، بہاولپور، جھنگ، میانوالی اور چنیوٹ میں کی گئیں۔

ترجمان کے مطابق لاہور سے فتنہ الخوارج کا ایک خطرناک دہشتگرد گرفتار کیا گیا، جس کا تعلق شمالی وزیرستان سے ہے۔ گرفتار دہشتگردوں کے قبضے سے دھماکا خیز مواد، ایک آئی ای ڈی بم، 18 فٹ حفاظتی فیوز تار اور شدت پسندانہ پمفلٹ برآمد کیے گئے ہیں۔

سی ٹی ڈی کا کہنا ہے کہ دہشتگرد کارروائی کر کے خوف و ہراس پھیلانا چاہتے تھے، تاہم بروقت آپریشن کے ذریعے بڑے ممکنہ خطرے کو ناکام بنا دیا گیا۔

 دہشت گردوں کی شناخت مدثر خان، سجاد احمد ،عاشق، اجمل خان، عمیر اقبال، محمد اعجاز، سہیل احمد اور عیسیٰ خان وغیرہ کے نام سے ہوئی۔

حکام کی جانب سے بتایا گیا کہ رواں ہفتے میں 1498 کومبنگ آپریشنز کے دوران 556 مشتبہ افراد کو گرفتار کیا گیا، کومبنگ آپریشنز میں 64 ہزار 511 افراد سے پوچھ گچھ کی گئی۔

ترجمان نے مزید کہا کہ دہشت گرد مختلف مقامات پر کاروائی کر کے عوام میں خوف و ہراس پھیلانا چاہتے تھے، سی ٹی ڈی محفوظ پنجاب کے ہدف پر عمل پیرا ہے، دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔