وزیراعظم شہباز شریف کل 2 روزہ سرکاری دورے پر متحدہ عرب امارات روانہ ہوں گے

اسلام آباد:وزیر اعظم شہباز شریف کل 2 روزہ سرکاری دورے پر متحدہ عرب امارات (یو اے ای)روانہ ہوں گے۔
ترجمان دفتر خارجہ شفقت علی خان کے مطابق دورے کے دوران وزیراعظم ورلڈ گورنمنٹس سمٹ میں شرکت کریں گے۔ یہ سربراہی اجلاس گورننس، اختراعات اور بین الاقوامی تعاون کے مستقبل پر تبادلہ خیال کے لیے منعقد ہو رہا ہے۔
ترجمان کے مطابق وزیراعظم پاکستان کو دورہ یو اے ای کی دعوت متحدہ عرب امارات کے نائب صدر و وزیر اعظم اور دبئی کے امیر شیخ محمد بن راشد المکتوم نے دی۔
 عالمی سربراہی اجلاس میں وزیر اعظم شہباز شریف پاکستان کے معاشی ترقی کے ویژن، ڈیجیٹل ٹرانسفارمیشن اورگورننس ریفارمز پر اظہار خیال کریں گے،اس کے علاوہ وزیراعظم متحدہ عرب امارات کی قیادت سے دو طرفہ ملاقاتیں بھی کریں گے۔
ترجمان دفتر خارجہ نے بتایا کہ وزیراعظم کا دورہ پاکستان اور متحدہ عرب امارات کے درمیان شراکت داری کو مزید مستحکم کرے گا، پاکستان اور  یو اے ای کے درمیان معیشت، تجارت، مختلف شعبوں میں قریبی تعاون ہے۔
 دبئی میں وزیر اعظم پاکستان کی مختلف ممالک کے سربراہان اور ملٹی نیشنل کمپنیوں کے سی ای اوز سے اہم ملاقاتیں بھی ہوں گی۔ دورے میں نائب وزیر اعظم اسحاق ڈار اور دیگر کابینہ ارکان بھی وزیراعظم کے ہمراہ ہوں گے۔