نریندرمودی اخلاقیات بھول گئے، ایک بار پھر پاکستانی فضائی حدود میں سفر

لاہور: بھارتی وزیرِ اعظم نریندر مودی نے ایک مرتبہ پھر پاکستانی فضائی حدود استعمال کرتے ہوئے سفرکیا، فرانس کے دورے پر جاتے ہوئے بھارتی وزیر اعظم نے پاکستان کی فضائی حدود میں سفر کیا۔
ایوی ایشن ذرائع کے مطابق بھارتی وزیر اعظم نریندر مودی خصوصی طیارے میں نئی دہلی سے پیرس جا رہے ہیں، مودی کا خصوصی طیارہ انڈیا ون لاہور کے قریب سے پاکستانی فضائی حدود میں داخل ہوا۔ 
نریندرمودی نے شیخوپورہ، حافظ آباد، منڈی بہاؤالدین، چکوال اور کوہاٹ پر 34 ہزار فٹ کی بلندی سے لگ بھگ 41 منٹ تک سفر کیا جس کے بعدبھارتی ائیر فورس کا بوئنگ 777 طیارہ پارا چنار سے افغان فضائی حدود میں داخل ہوا۔
خیال رہے کہ افغانستان کی فضائی حدود بند ہے لیکن بھارتی وزیراعظم کو اس سلسلے میں خصوصی اجازت دی جاتی ہے۔ 
ایوی ایشن حکام کا کہنا ہے کہ پاکستان کی فضائی حدود استعمال کرتے ہوئے مودی نے پاکستان حکومت یا عوام کیلئے خیر سگالی کا کوئی پیغام نہیں چھوڑا۔
خیال رہے کہ ایوی ایویشن قانون کے مطابق جب کی کسی وزیر اعظم کا سربراہ حکومت کا طیارہ کسی ملک کی فضائی حدود سے گزرتا ہےتو وہ اس ملک کی حکومت یا عوام کے لیے خیر سگالی کا پیغام جاری کرتا ہے تاہم مودی کی جانب سے ایسا کوئی پیغام جاری نہیں کیا گیا۔
 بھارتی وزیرِ اعظم نریندر مودی 3 روزہ دورے کے دوران پیرس میں اے آئی سمٹ کے تیسرے ایڈیشن کی صدارت کریں گے، مودی فرانس کا دورہ مکمل کر کے 12 فروری کو امریکا جائیں گے۔ اس موقع پر نریندر مودی اپنی دوسری وزارتِ عظمیٰ کے دوران پہلی بار صدر ڈونلڈ ٹرمپ سے ملاقات کریں گے۔