لبنان: حزب اللہ کے شہید سربراہ حسن نصر اللہ اور ہاشم صفی الدین کی نمازجنازہ ادا، ہزاروں افراد کی شرکت

بیروت: لبنان کی مزاحمتی تنظیم حزب اللّٰہ کے شہید سربراہ حسن نصراللّٰہ اور سیکریٹری جنرل ہاشم صفی الدین کی نماز جنازہ بیروت میں ادا کر دی گئی ہے،نماز جنازہ میں ہزاروں افراد نے شرکت کی۔
سید حسن نصر اللّٰہ اور سید ہاشم صفی الدین کے تاریخی جنازے میں شرکت کیلئے لبنان اور دنیا بھر سے لاکھوں افراد بیروت پہنچے ہیں۔
اس موقع پر بیروت میں امن و امان قائم رکھنے کےلیے فوج اور داخلی سیکیورٹی فورسز کے یونٹس تعینات کیے گئے،اور بیروت ایئرپورٹ روڈ عارضی طور پر بند کردیا گیا ۔

غیر ملکی میڈیا رپورٹس کے مطابق حزب اللہ کے سینیئر عہدیدار نے میڈیا کو بتایا کہ جنازے میں دنیا بھر سے ہزاروں افراد کے علاوہ 65 ممالک سے 800 شخصیات بھی شرکت کی ۔
واضح رہے کہ حسن نصر اللّٰہ 27 ستمبر 2024 کو اسرائیل کے جنوبی بیروت پر فضائی حملے میں شہید ہوئے تھے، جس میں اسرائیلی جیٹ طیاروں نے 85 ٹن دھماکہ خیز مواد سے ضاحیہ میں 6 رہائشی عمارتیں تباہ کر دی تھیں، جبکہ سید ہاشم صفی الدین 3 اکتوبر 2024 کو اسرائیلی حملے میں شہید ہوئے۔
حزب اللّٰہ نے سیکیورٹی خدشات کے پیش نظر دونوں رہنماؤں کے جنازے کو مؤخر کر دیا تھا، تاہم آج یہ تاریخی تقریب انتہائی سخت حفاظتی انتظامات کے ساتھ منعقد کی جا رہی ہے۔