چین کا دورہ کامیاب رہا ہے، ہم نے سی پیک کی بنیاد رکھی ، صدر مملکت

لاہور: صدر مملکت آصف علی زرداری نے کہا ہے کہ عوامی مشکلات میں کمی اور معاشی اشاریے بہتری کی جانب گامزن ہیں۔

صدر آصف علی زرداری کے اعزاز میں سابق گورنر پنجاب مخدوم احمد محمود کی طرف سے گزشتہ رات گئے عشائیہ دیا گیا جس میں گورنر سردار سلیم حیدر خان بھی شریک ہوئے۔

انہوں نے کہا کہ میرا چین کا دورہ کامیاب رہا ہے، ہم نے سی پیک کی بنیاد رکھی، اسے کامیاب بنائیں گے، چین اور پاکستان خطے کی ترقی کے لیے مشترکہ اقدامات کر رہے ہیں، چینی کمپنیاں پاکستان میں فیکٹریاں لگائیں گی، چین کی ہمارے خطے میں خاصی دلچسپی ہے۔

اس موقع پر صدر آصف زرداری نے گفتگو کرتے ہوئے کہا کہ عوام کی مشکلات میں کمی ہو رہی ہیں، معاشی اشارے بہتری کی طرف جا رہے ہیں، انتظامی امور کو بہتر کرنے کی ضرورت ہے۔

آصف زرداری نے مزید کہا کہ سندھ حکومت نے صحت اور تعلیم کی طرف خاصی توجہ دی ہے، سندھ میں نئی یونیورسٹیاں، کالج اور اسپتال بنائے گئے ہیں، سندھ حکومت نے سیلاب زدگان کو گھر بنا کر دیے ہیں، باقی صوبے بھی تقلید کریں۔