وزیراعظم کا امریکی صدر کے انسداد دہشت گردی میں پاکستان کے کردار کے اعتراف کا خیرمقدم

وزیراعظم شہباز شریف نے کہا ہے کہ امریکی صدر ڈونلڈ ٹرمپ کی جانب سے افغانستان میں انسداد دہشت گردی کے لیے پاکستان کے کردار کو تسلیم کرنا اور سراہنا قابلِ تحسین ہے۔

انہوں نے کہا کہ پاکستان نے دہشت گردی کیخلاف جنگ میں اہم کردار ادا کیا، امریکی صدر کا بیان دہشتگردی کیخلاف جنگ میں پاکستان کی قربانیوں کا اعتراف ہے۔

شہباز شریف نے کہا کہ پاکستان کے 80 ہزار سے زیادہ بہادر فوجیوں اور شہریوں نے دہشت گردی کے خلاف جنگ میں اپنی جانوں کا نذرانہ پیش کیا، لیکن ملک سے اس لعنت کے خاتمے کے لیے قوم اور قیادت کا عزم غیر متزلزل ہے۔

جس کے بعد وزیراعظم نے اپنے بیان میں کہا کہ پاکستان نے ہمیشہ دہشت گردی کے خلاف اہم کردار ادا کیا ہے اور اس لعنت کے مکمل خاتمے کے لیے پرعزم ہے۔ انہوں نے کہا کہ پاکستان دہشت گردی کی تمام اقسام اور مظاہر سے نمٹنے کے لیے پرعزم ہے اور اس جنگ میں بے پناہ قربانیاں دی ہیں۔

وزیراعظم شہباز شریف نے مزید کہا کہ امریکا کے ساتھ علاقائی امن و استحکام کیلئے شراکت داری جاری رہے گی۔

واضح رہے کہ امریکی صدر کا منصب سنبھالنے کے بعد کانگریس سے پہلے طویل ترین خطاب میں ڈونلڈ ٹرمپ نے افغانستان میں دہشت گردی کے خلاف تعاون پر حکومت پاکستان سے اظہار تشکر کیا ہے۔

ڈونلڈ ٹرمپ نے حکومت پاکستان سے اظہار تشکر کرتے ہوئے کہا کہ اس دہشتگرد کی گرفتاری میں مدد پر پاکستان کا خصوصی طور پر شکریہ اداکرتا ہوں، ساڑھے تین سال پہلے داعش نے 13 امریکیوں کو افغانستان میں قتل کیا، افغانستان میں امریکیوں کو ہلاک کرنے والا اس وقت امریکا لایا جا رہا ہے تاکہ وہ امریکا میں قانون کا سامنا کر سکے۔

صدر ٹرمپ نے اپنے خطاب میں کہا، ’میں فخر کے ساتھ اعلان کر رہا ہوں کہ میری انتظامیہ نے اس بھیانک حملے کے مرکزی دہشت گرد کو گرفتار کر لیا ہے، اور وہ اس وقت امریکا آ رہا ہے تاکہ امریکی انصاف کی تیز دھار تلوار کا سامنا کرے۔‘

انہوں نے مزید کہا کہ پاکستان خطے میں امن و استحکام کے لیے امریکہ کے ساتھ اپنی قریبی شراکت داری جاری رکھے گا تاکہ دہشت گردی کے خاتمے اور خطے میں استحکام کے مشترکہ مقاصد حاصل کیے جا سکیں۔