پاکستان صنفی مساوات کے حوالے سے سوڈان کے بعد دنیا کا دوسرا بدترین ملک قرار،رپورٹ

پاکستان کو عالمی اقتصادی فورم (ڈبلیو ای ایف) کی صنفی مساوات سے متعلق رپورٹ میں دنیا کے بدترین ممالک میں شامل کرلیا گیا ہے۔
رپورٹ کے مطابق پاکستان 146 ممالک میں سے 145 ویں نمبر پر ہے، فہرست میں اس نمبر سے نیچے صرف افریقی ملک سوڈان ہے،جبکہ اس کے برعکس پڑوسی ملک بنگلہ دیش 99ویں اور بھارت 129ویں نمبر پر ہے
رپورٹ میں کہا گیا ہے کہ پاکستان میں ملازمتوں، اجرت کی ادائیگی میں بھی صنفی تفریق کی واضح خلیج ہے۔
ورلڈ بینک کی رپورٹ میں اجرتوں اور روزگار کے مواقع میں صنفی فرق کو بھی اجاگر کیا گیا ہے اور حکومت اور کاروباری اقدامات کو ناکافی قرار دیا گیا ہے۔
عالمی اقتصادی فورم کی رپورٹ کے مطابق خواتین کو مردوں کے مقابلے میں 18 فیصد کم اجرت ملتی ہے،۔ اگر ایک مرد 1000 روپے کماتا ہے تو عورت اسی کام کے صرف 818 روپے کماتی ہے۔ 
پاکستان کے زرعی شعبے میں صنفی اجرت کا فرق خاص طور پر واضح ہے، جہاں 68 فیصد خواتین ملازمت کرتی ہیں لیکن ان میں سے 76 فیصد کو تنخواہ نہیں دی جاتی، جبکہ اسی شعبے میں 24 فیصد مرد بغیر تنخواہ کے کام کرتے ہیں۔
اسی طرح کارپوریٹ اور صنعتی شعبوں میں خواتین کی قیادت کی نمایاں کمی ہے۔ پاکستان میں، صرف 0.14 فیصد خواتین انتظامی عہدوں پر فائز ہیں، جبکہ مردوں کے 2.33 فیصد کے مقابلے، یہ ملک میں کام کی جگہ پر صنفی فرق کو ظاہر کرتا ہے۔
یاد رہے کہ عالمی اقتصادی فورم (ڈبلیو ای ایف) کی ’گلوبل جینڈر گیپ رپورٹ 2023‘ میں پاکستان کو 146 ممالک میں سے 142ویں درجے پر رکھا گیا تھا، جب کہ صنفی مساوات کی شرح 57.5 فیصد قرار دی گئی تھی جو کہ 2006 کے بعد سب سے زیادہ تھی۔
رپوٹ میں بتائے گئے رعداد و شمار کے مطابق پاکستان میں صرف 36 فیصد خواتین معاشی سرگرمیوں میں حصہ لیتی ہیں جبکہ صرف 23 فیصد خواتین افرادی قوت کا حصہ ہیں۔ ملک میں 40 ملین سے زائد خواتین لیبر فورس سے باہر ہیں جس کی وجہ سے صنفی معاشی مساوات کی سطح انتہائی پست ہے۔
رپورٹ میں پاکستان کو علاقائی اور عالمی دونوں درجہ بندیوں میں سب سے نیچے رکھا گیا تھا، پاکستان سے نیچے صرف ایران، الجزائر، چاڈ اور افغانستان ہیں، 2022 میں پاکستان 146 میں سے 145 ویں نمبر پر تھا۔