واپڈا نے  ہائیڈرالک ریسرچ اینڈٹریننگ انسٹی ٹیوٹ کی مشاورتی خدمات کا کنٹریکٹ ایوارڈ کردیا

لاہور:واپڈا نے چیچوکی ملیاں میں ہائیڈرالک ریسرچ اینڈٹریننگ انسٹی ٹیوٹ کے قیام کی غرض سے مشاورتی خدمات کا کنٹریکٹ ایوارڈ کردیا۔ یہ کنٹریکٹ اے سی ای کو ایوارڈ کیا گیا ہے، جس کی مالیت  11کروڑ 69   لاکھ  روپے ہے۔
 کنٹریکٹ کے تحت مذکور ہ انسٹی ٹیوٹ کے لئے منصوبہ بندی، انجینئرنگ ڈیزائن،تعمیراتی کام کی نگرانی اور کنٹریکٹ ایڈمنسٹریشن کی جائے گی۔  کنٹریکٹ کا دورانیہ اڑھائی سال ہے۔  کنٹریکٹ  پر دستخط کرنے کی تقریب واپڈا ہاؤس لاہور میں ہوئی۔ 
جنرل منیجر(ہائیڈروپلاننگ) واپڈا ڈاکٹر خاور منیر اور  اے سی ای کے ریجنل ہیڈ (نارتھ) غلام عارف خان نے کنٹریکٹ پر دستخط کیے۔  ممبر (واٹر)  واپڈا جاوید اختر لطیف،  جنرل منیجر (کوآرڈی نیشن اینڈ مانیٹرنگ)  واٹر محمد اعظم جوئیہ اور دیگر سینئر آفیسرز بھی تقریب میں موجود تھے۔ 
واپڈا ہائیڈرالک انسٹی  ٹیوٹ کے تحت ریسرچ اور ٹیسٹنگ کے لئے ہائیڈرالک ماڈلز کنسٹرکشن کی سہولت، جیوٹیک ماڈلنگ، ہائیڈروپاور ماڈل ٹیسٹنگ،  جیوٹیک، ہائیڈرالکس، سیڈی مینٹیشن، ہائیڈروپاور اور کمپیوٹر لیبارٹریز، واٹر ریسورسز اور ہائیڈروپاور ٹریننگ انسٹی ٹیوٹ کے قیام کے ساتھ ساتھ ماڈرن ورکشاپ، لائبریری/ ریکارڈ روم، آفس بلڈنگ، ہاسٹلز، ریسٹ ہاؤس اور سٹاف کالونی بھی تعمیر کیے جائیں گے۔
 واپڈا ڈیم، نہروں اور بیراجوں کے ماڈلز کی ہائیڈرالک سٹڈی کے لئے  بین الاقوامی معیار کا جدیدانسٹی ٹیوٹ قائم کررہا ہے، جس میں دستیاب سہولیات سے ملک کے دیگر ادارے بھی استفادہ کرسکیں گے۔ مستقبل میں انسٹی ٹیوٹ کی توسیع  پاکستان مختلف سٹرکچرز کی عددی ماڈلنگ میں خودکفیل ہوجائے گا۔