جعفر ایکسپریس حملہ: کلیئرنیس آپریشن میں ہلاک دہشت گردوں کی تصاویر منظر عام پرآ گئیں

راولپنڈی:سیکیورٹی فورسز نے بلوچستان میں کامیاب آپریشن کرتے ہوئے جعفر ایکسپریس کو یرغمال بنانے والے تمام دہشت گردوں کو ہلاک کردیا جب کہ کلیئرنیس آپریشن میں جہنم واصل ہونے والے دہشت گردوں کی تصاویر منظر عام پر آگئیں۔
پاک فوج کے شعبہ تعلقات عامہ (آئی ایس پی آر) کے ڈی جی لیفٹننٹ جنرل احمد شریف چوہدری نے اس حوالے گفتگو کرتے ہوئے بتایا تھا کہ دہشت گردوں نے 11 مارچ کو تقریباً ایک بجے کے قریب بولان کے علاقے اوسی پور میں ریلوے ٹریک دھماکے سے اڑا دیاتھا۔
دہشت گردوں نے بعد میں جعفر ایکسپریس کو روک کر مسافروں کو یرغمال بنایا، دہشت گرد افغانستان میں اپنے سہولتکاروں سے رابطے میں تھے، ٹرین میں 440 سے زائد مسافر سوار تھے۔
ترجمان آئی ایس پی آر کے مطابق سیکیورٹی فورسز نے بھرپور طریقے سے آپریشن شروع کیا اور یرغمالیوں کو بازیاب کرایا، وہاں پر موجود تمام 33 دہشت گردوں کو ہلاک کر دیا گیا ہے۔
ترجمان نے کہا کہ مرحلہ وار یرغمالیوں کو رہا کرایا گیا، آپریشن سے قبل دہشت گرد 21 جانیں لے چکے تھے، آپریشن کے دوران 4 ایف سی اہلکار شہید ہوئے،جبکہ آپریشن میں آرمی، ایئرفورس، فرنٹئیر کور اور آج ایس ایس جی کے جوانوں نے حصہ لیا اور یرغمالیوں کو مرحلہ وار رہا کروالیا گیا۔
ترجمان پاک فوج نے بتایا کہ یہ دہشت گرد دوران آپریشن افغانستان میں اپنے سہولت کاروں اور ماسٹر مائنڈ سے سٹیلائٹ فون کے ذریعے رابطے میں تھے۔

رپورٹ کے مطابق اب فائنل کلیئرنیس آپریشن میں جہنم واصل ہونے والے دہشت گردوں کی تصاویر منظر عام پر آگئیں ہیں۔
سیکیورٹی ذرائع نے کہا کہ 12 مارچ کو دوران فائنل کلیئرنیس آپریشن  میں مارے جانے والے دہشت گرد غیر ملکی اسلحہ سے لیس تھے،  تصاویر میں دیکھا جا سکتا ہے کے دہشت گرد ٹرین کے ارد گرد مارے گئے۔
دوسری جانب سانحہ جعفر ایکسپریس میں جاں بحق پانچ مسافروں کی میتیں سول اسپتال کوئٹہ منتقل کی گئیں ۔ جبکہ ریلوے کانسٹیبل شمروز خان اور کیرج اسٹاف ممتاز کی نمازِ جنازہ ادا کردی گئی۔
ایک لاش کی شناخت صغیراحمد کے نام سے ہوئی دو کی شناخت نہ ہوسکی۔